Snap Judgment

1. கலர் டிவியும், கம்ப்யூட்டரும் கவருமா மக்களை?

இந்தத் தேர்தலுக்கு மல்லு கட்டியுள்ள தி.மு.க., மற்றும் அ.தி.மு.க., ஆகிய இரண்டு கட்சிகளும் பலப் பல “பளபள’ அறிவிப்புகளை அறிவித்துள்ளன. தி.மு.க., சார்பில் இலவச கலர் “டிவி’ கவர்ச்சிகரமான அறிவிப்பாக உள்ளது. அ.தி.மு.க.,வில் மிகச் சமீபத்தில் அறிவிக்கப்பட்டுள்ள, பிளஸ் 2 மாணவர்களுக்கு இலவச கம்ப்யூட்டர் அறிவிப்பு தான் மிகக் கவர்ச்சியாக உள்ளது. பொழுதுபோக்கு, படிப்பு என்ற இரு தேவைகளில் எதை மக்கள் தேர்ந்தெடுக்கின்றனர் என்பது வரும் 11ம் தேதி தெரிந்துவிடும். இரு கட்சிகளின் தேர்தல் அறிக்கைகளின், பிரசாரங்களின் “ஹைலைட்ஸ்’ கீழே கொடுக்கப்பட்டுள்ளது.

முதல்வர் ஜெயலலிதா :

ஜெயலலிதா பிரசாரத்தில் மக்களிடையே பேசிய விவரம் வருமாறு:

* ரேஷனில் அரிசியை வாங்கும் குடும்ப அட்டைதாரர்களுக்கு பத்து கிலோ அரிசி இலவசம்.

* முல்லை பெரியாறு அணையின் நீர்மட்டத்தை 152 அடியாக உயர்த்த நடவடிக்கை எடுக்கப்படும்.

* வேலை இல்லாத குடும்பத்தில் ஒருவருக்கு வேலை வாய்ப்பு உருவாக்கித் தரப்படும்.

* மாநில அரசின் வருவாயை பயன்படுத்தி, விவசாய கூட்டுறவு கடன்கள் அனைத்தும் ரத்து செய்யப்படும்.

* நெசவாளர் நலன் காக்க பாதுகாப்பு திட்டம் கொண்டு வரப்படும்.

* பள்ளிகளில் மாணவர்களிடம் வசூலிக்கப்படும் சிறப்பு கட்டணம் ரத்து செய்யப்படும்.

* பிளஸ் 2 தேர்ச்சி பெறும் அனைத்து மாணவ, மாணவியர்களுக்கு இலவசமாக கம்ப்யூட்டர் வழங்கப்படும்.

* இரண்டாயிரத்து 900 கோடி ரூபாயில் இரண்டு நீர்வள ஆதார திட்டம் அமைக்கப்படும்.

* உழவர் பாதுகாப்பு திட்டம் போல மீனவர் பாதுகாப்பு திட்டம் கொண்டு வரப்படும்.

* தமிழகத்தில் தொழில் வளர்ச்சி அடைந்துள்ளது. எந்த தொழிற்சாலைகளிலும் சமூக விரோதிகள், ரவுடிகள் பண வசூலில் இறங்கியது இல்லை.

* தமிழகத்தில் பணப்புழக்கம் அதிகரித்தது அ.தி.மு.க., ஆட்சியில் தான்.

* வேறு எந்த மாநிலத்திலும் இல்லாத அளவுக்கு சட்டம்/ஒழுங்கு நிலை நாட்டப்பட்டது. முந்தைய ஆட்சிக் காலத்தில் அரசாங்கத்தை எதிர்த்து சாலை மறியல், துப்பாக்கிச் சூடு போன்ற கலவரம் ஏற்பட்டதுண்டு. பஸ் எரிப்பு சம்பவங்களும் நடந்ததுண்டு. ஆனால், இதுபோன்ற சம்பவங்கள் எங்கள் ஆட்சியில் நடக்கவில்லை.

* சுனாமி ஏற்பட்டதும் தமிழக அரசின் பணியை உலக நாடுகளே பாராட்டின.

* மழையால் தமிழகம் முழுவதும் ஏற்பட்ட வெள்ளத்தின் போதும், தமிழக அரசின் மீட்புப் பணிகள் வேகமாக நடந்ததை மக்களே அறிவார்கள்.

* பள்ளி மாணவ, மாணவியர்களுக்கு இலவச சைக்கிள், இலவச பாடப் புத்தகம் வழங்கியது அ.தி.மு.க., ஆட்சியில் தான்.

* சென்னையில் மக்கள் குடிநீருக்காக குடத்தை எடுத்துக் கொண்டு அலைவது தடுத்து நிறுத்தப்பட்டது எங்கள் ஆட்சியில் தான். வீராணம் குடிநீர் திட்டத்தை ஒரே ஆண்டுக்குள் நிறைவேற்றி, சென்னை மாநகர மக்களின் தாகம் தீர்த்தது எங்கள் ஆட்சியில் தான்.

* பல்வேறு தொழில்நுட்ப பூங்காக்கள் இந்த ஆட்சியில் அமைக்கப்பட்டன. இதன் மூலம் பல லட்சம் இளைஞர்களுக்கு வேலை வாய்ப்பு கிடைத்தது. அடுத்த ஐந்து ஆண்டில் ஐந்து லட்சம் இளைஞர்களுக்கு வேலை வாய்ப்பு ஏற்படுத்தப்படும்.

* சென்னையில் பெண்களுக்கும், ஆண்களுக்கும் தனித்தனியே விடுதிகள் கட்டப்படும்.

* சென்னைக்கு அருகில் இரண்டு சேட்டிலைட் நகரங்கள் அமைக்கப்படும். இதனால் பல தொழிற்சாலைகள் உருவாகும்.

* சென்னைக்கு அருகில் தொழிற்சாலைகள் அமைவது போல, மாவட்டம் தோறும் தொழிற்சாலைகள் தொடங்கப்படும்.

* அ.தி.மு.க., ஆட்சியில் தான் தொழிலதிபர்கள் எந்தவித அச்சுறுத்தலும் இன்றி வளர முடியும். நேரடி வேலை வாய்ப்பும், மறைமுக வேலை வாய்ப்பும் பல லட்சம் பேருக்கு கிடைக்க இந்த ஆட்சி பாடுபடும்.

* ஏழைகளுக்கு இலவச நிலம் தருவதாக தி.மு.க., தேர்தல் அறிக்கையில் கூறியிருப்பது, போகாத ஊருக்கு வழி சொல்வதாக உள்ளது.

* சென்னையில் அமல்படுத்தப்பட்டுள்ள செட்டாப் பாக்ஸ் திட்டத்தை ஒழிப்போம்.

இவ்வாறு முதல்வர் ஜெயலலிதா, பொதுமக்களுக்கு தனது பிரசாரத்தில் பல்வேறு வாக்குறுதிகளை கொடுத்துள்ளார்.

தி.மு.க., தலைவர் கருணாநிதி

தி.மு.க., தலைவர் கருணாநிதியின் தேர்தல் பிரசாரத்தில் இதுவரை கூறியது என்ன? அதன் விவரம் வருமாறு:

* ஜெயலலிதா தினந்தோறும் கற்பனையான வாக்குறுதிகளை சொல்லி வருகிறார்.

* எங்கள் தேர்தல் அறிக்கை தான் கதாநாயகன். கதாநாயகன் இருந்தால் வில்லன் என்று ஒருவர் இருக்க வேண்டும். அந்த வில்லன் ஜெயலலிதா தான்.

* இந்திய வரலாற்றில் மாநிலத்திலிருந்து 13 மத்திய அமைச்சர்கள் இடம் பெற்றதே சாதனை தான்.

* வியாபாரிகளின் நலனுக்காக “மறுவிற்பனை’ வரியை ரத்து செய்தது தி.மு.க., ஆட்சி தான்.

* அரிசி விவகாரத்தில் ஜெயலலிதா அறிவிப்பு செய்திருப்பது ஏட்டிக்கு போட்டி.

* தனி ஆட்சியோ, கூட்டணி ஆட்சியோ, எப்படி அமைந்தாலும் பரவாயில்லை. இந்த ஆட்சி ஒழிய வேண்டும்.

* தி.மு.க., ஆட்சிக்கு வந்தால் வாரம்தோறும் சத்துணவில் இரண்டு முட்டை வழங்கப்படும்.

* ஒரு கிலோ அரிசி இரண்டு ரூபாய்க்கு கொடுக்க முடியுமா. இலவச டிவி தர முடியுமா என்று கேட்கிறார்கள். முடியும். முடியாது என்பது தி.மு.க., அகராதியிலேயே கிடையாது.

* கல்வி கட்டணத்தை கண்டிப்பாக குறைப்போம்.

* “தமிழகத்தை முதல் மாநிலமாக்குவோம்’ என்று ஜெயலலிதா அறிவித்தார். முதலைகள் மாநிலமாக மாற்றிவிட்டார்.

* மீண்டும் ஆட்சிக்கு வந்தால் ஏழை பெண்கள் திருமண நிதிஉதவி திட்டம் கொண்டுவரப்படும்.

* தாய்மார்கள் பொது அறிவு பெற கலர் “டிவி’ தருகிறோம்.

* “கலர் “டிவி’ கொடுப்பாய், கேபிள் இணைப்பு கொடுக்க முடியுமா என்று ஒருவன் கேட்கிறான். அவசியம் ஏற்பட்டால், அதையும் கொடுப்போம்.

* காஸ் ஸ்டவ் தருவோம்.

* விவசாயி இயற்கையாக மரணமடைந்தால், அவர் பெற்ற கூட்டுறவு கடனை ரத்து செய்வோம்.

* நிலமற்ற ஏழை விவசாய குடும்பத்திற்கு இரண்டு ஏக்கர் நிலம் வழங்கப்படும்.

* மகளிர் சுய உதவிக் குழுக்களை போல, இளைஞர்களுக்கும் சுய உதவிக் குழுக்கள் ஏற்படுத்துவோம்.

* கூட்டுறவு சங்கத் தேர்தலை உடனே நடத்துவோம்.

* சென்னை நகரில் மக்கள் தொகையை கருத்தில் கொண்டு மேலும் பாலங்கள் கட்டப்படும்.

* சென்னையில் உள்ள பன்னாட்டு விமான நிலையத்தை பெரிய அளவில் விரிவாக்கம் செய்யும் பணியை விரைந்து மேற்கொள்ளுவோம்.

* சுனாமி நிவாரண நிதி வழங்கப்பட்டதில் நடந்த முறைகேடு குறித்து விசாரணை நடத்துவோம்.

* மீண்டும் கண்ணகி சிலையை அதே இடத்தில் நிறுவுவோம்.

* மீண்டும் சட்டசபை மேலவையை கொண்டு வர பாடுபடுவோம்.

* அனைத்து ஜாதியினரும் அர்ச்சகராகலாம் என்ற சட்டத்தை கொண்டு வருவோம்.

* காலியாக உள்ள பணியிடங்களில் மூன்று லட்சம் இளைஞர்களுக்கு வேலைவாய்ப்பு வழங்குவோம்.

* எதிர்முகாமில் இருப்பவர்கள், பிரபல நடிகர் ஒருவருக்கு 100 கோடி ரூபாய் பேரம் பேசி, பிரசாரத்துக்கு அழைத்தனர். அவர் வரமறுத்துவிட்டார்.

* எங்கள் ஆட்சியில் ஜாதி கலவரங்கள் ஏற்பட, எதிர்க்கட்சிகள் தான் காரணம்.

இவ்வாறு அவர் பிரசாரம் செய்தார்.

2. தேர்தலுக்குப் பின் கூட்டணிகளில் தலைகீழ் திருப்பம்? அடுத்த காட்சி :: அணி மாற கட்சிகள் இப்போதே வியூகம் அமைப்பு –

கடந்த பார்லிமென்ட் தேர்தலில் காங்கிரஸ் தலைவர் சோனியாவை முதல்வர் ஜெயலலிதா கடுமையாக விமர்சித்து பேசினார். காங்கிரஸ் தலைவர்களையும், பா.ம.க., மற்றும் கம்யூனிஸ்ட் கட்சித் தலைவர்களையும் கடுமையாக சாடினார். ஆனால், இந்த முறை முதல்வர் ஜெயலலிதா தனது பிரசாரத்தின் போது தனது ஆட்சியின் சாதனைகளை மட்டுமே எடுத்துக் கூறியுள்ளார். தி.மு.க.,வைத் தவிர வேறு எந்தக் கட்சியையும் ஜெயலலிதா பெரிய அளவில் விமர்சிக்கவில்லை.

டாடாவை மத்திய அமைச்சர் தயாநிதி மிரட்டியதாக எழுந்துள்ள குற்றச்சாட்டு தேர்தலில் எதிரொலிக்கும் என்பதால் டாடா தரப்பில் இருந்து மறுப்பு வெளியாக வேண்டும் என்பது தி.மு.க.,வின் எதிர்பார்ப்பாக இருந்தது. அதற்காக எவ்வ ளவோ நெருக்கடி கொடுத்தும் காங்கிரஸ் தலைமை அதற்கு இசையவில்லை. இது தி.மு.க.,வுக்கு பெரும் அதிருப்தியை ஏற்படுத்தியுள்ளது. மகாஜன் இறுதிச் சடங்கிற்கு தயாநிதி சென்ற விவகாரம் காங்கிரசிலும் பெரும் சர்ச்சையை கிளப்பியுள்ளது.

அறிஞர் அண்ணா ஆதரிக்கும் முரசு _ஒலி

1. இசைக்கு அடுத்தபடியாகத் தமிழரின் செவிக்கும் சிந்தனைக்கும் இனிமை பயப்பதாகும்
2. போர்க் கருவியாக மட்டுமல்ல, புகழ்க்கருவியாக, கொடை அறிவிக்கும் கருவியாகக் கொள்ளப்பட்டு தமிழகத்தில் ஏற்றம் பெற்றிருந்த ஒன்றாகும்.
3. கேட்டுத் தமிழர் இன்புறுவர்; மாற்றார் மருளுவர்; இறுதி வெற்றி பெற்றுத் தமிழர் மகிழ்ச்சி கொள்வர்.
4. வீரத்தினை விளக்கிற்று; வீண் ஆரவாரத்தை ஆர்ப்பரிப்பைக் காட்டும் கருவியாக இருந்ததில்லை.
5. கேடு களைந்திட விழைவோருக்கு, நாடு வாழ்ந்திட வழி காண விரும்புவோருக்கு, தேவைப்படும் எழுச்சியைத் தரவல்லது.
6. தம்பியின் முரசு தன்னைச் சிறிது போழ்து தட்டி மகிழ்கின்றேன்.
7. இன்று மீண்டும் தமிழர் தன்னரசு பெற்றுத் தரணியில் தலை நிமிர்ந்து வாழ்ந்திட நடாத்தப்பட்டு வரும் விடுதலைக் கிளர்ச்சிக்கு ஓர் எழுச்சி முரசாக அமைந்து பணியாற்றி வருகிறது.
8. இன்று நமது நாடு, மலர்த்தோட்டமாகவுமில்லை; நமது அரசும் நடத்திடவுமில்லை. எனவேதான் ‘முரசு’ தேவைப்படுகிறது.
9. ‘போர் முரசு’ – இதன் மூலம் கிடைக்கும் எழுச்சி, வீடெல்லாம் விழா என்று கூறத்தக்க விடுதலையைப் பெற்றிட, நமக்கு ஆர்வம் தரும் – தந்து வருகிறது. அந்த ஆர்வத்தின் வளர்ச்சி, வெற்றியை நமக்கு அளித்திடும். அந்த எதிர்காலத்தை நோக்கிச் செல்கிறோம்.

அண்ணாதுரை
நன்றி: 1960, 61, 62 – முரசொலி – பொங்கல் மலர்கள்

நமீதா அறிமுகம் செய்த ‘எங்கள் அண்ணா‘ விஜய்காந்த்தின் முரசு ஒலிக்க செய்வீர்.

அரசியல் | Election Tamil Nadu | தமிழ்ப்பதிவுகள்

1. முதலில் மக்கள் மனத்தில் இருக்கும் ஓர் ஆதங்கம் – பறவைக் காய்ச்சல் நாடெங்கும் பரவி இருக்கும் காட்சி. பெண்மணிகள் அழுது கொண்டே மரக்கறி வெட்டிக் கொண்டிருக்கின்றனர்.

2. உங்களுக்கு பறவைக் காய்ச்சல் வந்துவிடுமோ என்னும் பயமா?
உதயசூரியனுக்கு ஓட்டுப் போடுங்க… டாமிஃப்ளூ விற்க டீலர்ஷிப் கொடுப்போம்.

3. கலைஞர் தன்னைத்தான் தருவார்!
தனக்காகத்தான் தருவார்!!!

திமுக-வின் நிஜ விளம்பர விவரிப்பு

பதிவுக்கு உணர்வூக்கம் கொடுத்த நிஜ குறுஞ்செய்தி:

நன்றி: தினமலர்

அரசியல் | Election Tamil Nadu | தமிழ்ப்பதிவுகள்

இந்தத் தேர்தலில் என்னுடைய மேலான வாக்கு யாருக்கு என்று கேட்பவர்களுக்காக:

விளம்பரம் வெளியான இதழ்: தினமலர்

ரொம்ப சிந்திப்பவர்களுக்கான மறுப்புக்கூறு: இலவசமாகக் கணினி கொடுக்கும் அதிமுக அறிவிப்புக்கும் இந்தப் பதிவுக்கும் யாதொரு சம்பந்தமும் கிடையாது.

அரசியல் | Election Tamil Nadu | தமிழ்ப்பதிவுகள்

எழுத்தாளர் சாரு நிவேதிதாவை பற்றி பலருக்கும் தெரிந்திருக்கலாம்.அவர் எழுதியுள்ள லேட்டஸ்ட் கட்டுரையில் அரசியல் பற்றியும் தேர்தல் பற்றியும் தன் கருத்துக்களை எழுதியுள்ளார்.

வழக்கம்போல் விளிம்புநிலை மனிதர்களுக்காக கவலைப்பட்டிருக்கும்(வேசிகள் உள்பட)சாரு இன்று வைகோவின் தயாநிதி மாறன் மீதான புகார்களைத்தான் தமிழ் நாட்டில் உள்ள அனைத்து டீக்கடைகளிலும் பேசு வருவதாக எழுதி கிச்சு கிச்சு மூட்டியுள்ளார்.

மற்ற பலரையும் போல் ஒரு சீட்டுக்காகத்தான் வைகோ திமுக கூட்டணியை விட்டு சென்றதாக எழுதியுள்ள சாரு, இந்த கட்டுரையில் ஜெவை தாக்கியதை விட திமுகவை தாக்கியது அதிகம்.அதை விடுங்கள்.

பொருட்படுத்ததக்க விஷயங்கள் சில

தினமலரை பெயர் சொல்லி தினகரன் தாக்குவதாகவும் தினமலர் நிர்வாகி தண்ணியடிக்கும் இடததையெல்லாம் தினகரன் எழுதுவது அடாவடி என்று திருவாய் மலர்ந்தருளியுள்ளார்.சாருவுக்கும் அந்துமணி கும்பலுக்கும் உள்ள நெருக்கத்தை இங்கு நினைவு கூறாதீர்கள்.சாரு அறச்சீற்றம் உடையவர்.

இலக்கியவாதிகள் அரசியலுக்கு போவதிலும் சாருவுக்கு வருத்தமே என்று தெரிகிறது. சல்மாவை பற்றி அவர் கூறும்போது அவர் தோற்கும் அணியில் இருக்கிறார் என்று ஒரே போடாக போடுகிறார்.ஆகவே அவர் ஆசை, எதிர்ப் பார்ப்பு என்ன என்பது வெளியே வந்துவிட்டது.(ஆனால் ரொக்கையா மாலிக் என்ற சல்மா தேர்தல் களத்தில் பெண்களை கவர்ந்துவிட்டதாகவும் கண்டிப்பாக ஜெயிப்பார் என்று மனம்திருந்திய(?) குமுதம் ரிப்போர்ட்டரில் படித்த ஞாபகம்)

அடுத்ததாக தன் உற்ற தோழன் ரவிகுமார் தேர்தலில் நிற்பதற்காக தாடியை இழந்து பெட்டி வாங்கிவிட்டதாக எழுதியிருப்பது சாருவின் ஆதங்கத்தை நன்றாகவே வெளிகாட்டுகிறது.

திராவிட கட்சிகளுக்கு இலக்கியவாதிகளை தெரியாதாம்.(அவர்கள் ஞான சூன்யங்கள் என்கிறார்).ஆனால் மற்ற கட்சிகாரர்களுக்கு இலக்கிய வாதிகளை தெரியுமாம்.தெரிந்தவர்கள் சட்டசபைக்கு போவது நல்லது இலலை என்று கூறுகிறார் புரட்சி முற்போக்கு எழுத்தாளர் சாரு.

கவலை வேண்டாம் சாரு அவர்களே,திமுக வென்றாலும் தினமலர் நிர்வாகி தண்ணி அடிக்கும் இடத்தை மாற்ற தேவையில்லை.திமுகவினர் அந்தளவிற்கு அடாவடி செய்ததில்லை.ஆனால் இந்த முறை வென்றால் செய்யமாட்டார்கள் என்பதற்கு உத்தரவாதமும் தருவதற்கில்லை.

1. தேர்தல் ஆதரவு: சிறுபான்மை உரிமை பாதுகாப்பு கழகம் கருத்து : திமுக கூட்டணிக்கு எஸ்றா சற்குணம் தலைமையில் சில ஆயர்கள் ஆதரவு தெரிவித்துள்ளதை தேசிய சிறுபான்மை உரிமை பாதுகாப்புக் கழகம் கண்டித்துள்ளது.

ஒரு சில தனி நபர்கள் ஒரு குறிப்பிட்ட கூட்டணிக்கு தேர்தலில் ஆதரவு தெரிவிப்பதை, ஒட்டுமொத்த சிறுபான்மையினரின் முடிவு என கருதக் கூடாது.

மத மாற்றத் தடைச் சட்டம் தமிழகத்தில் கொண்டுவரப்பட்ட போதிலும் பின்னர் அது விலக்கிக் கொள்ளப்பட்டது. ஆனால், இன்றளவும் காங்கிரஸ் கட்சி ஆளும் சில மாநிலங்களில் அந்தச் சட்டம் அமலில் உள்ளது. எனவே, சிறுபான்மை மக்கள் திமுக கூட்டணியை இத்தேர்தலில் ஆதரிக்க மாட்டோம். இம்மக்களை பாதுகாக்கும் வேட்பாளர்களுக்கு தேர்தலில் ஆதரவு அளிப்போம்.

– ஒருங்கிணைப்பாளர் அண்டன் கோம்ஸ்

2. “பொன்’மலையை வெட்டி தலா 1 கிலோ தங்கம்?’: திருச்சியில் தற்போது பரபரப்பாக பேசப்படும் அளவுக்கு ஒரு துண்டுப்பிரசுரம் வெளியிடப்பட்டுள்ளது.

“அகில இந்திய மலஜலம் கழிப்போர் சங்கம்‘ என்ற பெயரில் உள்ள இதன் தொடக்கமே படு நக்கலாக “பொய்யே துணை’ எனத் தொடங்குகிறது. சங்கம் தேர்தலில் போட்டியிட்டு வெற்றி பெற்றால்… என்ற வாக்குறுதிகள் பட்டியலும் இதில் கொடுக்கப்பட்டுள்ளது.

“குடிசை வீடுகள் அனைத்தையும் மாற்றி சகல வசதிகளும் நிறைந்த வீடுகள் கட்டித் தரப்படும். ஒவ்வொரு வீட்டிலும் இணைக்கப்படும் 5 குழாய் இணைப்புகள் மூலம் பச்சை மற்றும் புழுங்கல் அரிசிகளும், கோதுமை மாவு, துவரம்பருப்பு, பாசிப்பருப்பு, எண்ணை வகைகள், ஹார்லிக்ஸ், போர்ன்விட்டா என சகலமும் வீடுகளுக்கே வழங்கப்படும். திருச்சியிலுள்ள “பொன்மலை’யை உண்மையான “பொன்’ மலையாக மாற்றி வெட்டி மக்களுக்கு 1 கிலோ தங்கம் வழங்கப்படும்’

என்பது உள்ளிட்ட பல்வேறு வாக்குறுதிகள் வழங்கப்பட்டுள்ளன.

“எஸ்.பி. சையதுமுகமது என்கிற சத்யானந்த யோகி பாபா’ என்ற பெயரில் அச்சடிக்கப்பட்டுள்ள இந்த துண்டுப் பிரசுரத்தில் முகவரி ஏதுமில்லை.

3. பொன். தனசேகரன் ::

நிகழ்ச்சி: வணக்கம் தமிழகம்
உரை: சுப வீரபாண்டியன்
நாள்: மே 4 2006

பகுதி 1:

இன்னொரு பகுதி:

நன்றி: தினகரன்

சில தேர்தல்களில் சில வலைப்பதிவுகள்

2006 தேர்தலில் முக்கிய தமிழ் வலைப்பதிவுகள் எவ்வாறு செயல்பட்டன, எவ்விதம் செய்திகளை வழங்கின, எவ்வளவு பயன்பட்டன, எங்ஙனம் முக்கியமானது?

1. இட்லி-வடை: அலுவல் சம்பந்தமான க்ளையண்ட் விசிட்டில் தமிழ் நண்பரை முதன்முதலாக சந்தித்தேன். வழக்கமான வானிலை, போக்குவரத்து உசாவலுக்குப் பின் தமிழகத் தேர்தல் குறித்து பேச்சு திரும்பியது. என்னுடைய வலைப்பதிவு(கள்) குறித்தும் சிறிது கோடிட்டேன். ‘எனக்கு இந்த ப்ளாக் எல்லாம் தெரியாது… இண்ட்ரெஸ்ட் கிடையாது. நீங்க இட்லி-வடை வெப்சைட் படிப்பது உண்டா?’ என்று பேச்சை முடித்துக் கொண்டார்.

   தேர்தல் 2006-இல் தமிழ்ப்பதிவுகளின் வலைத்துடிப்பு.

2. தேர்தல் செய்தி கண்காணிப்பு 2006: படபடக்கும் இள ரத்தத்தை முறை செய்து சீராக்க வழிகாட்டி இல்லாமல் காட்டாறாக கோபமான பதிவுகள். தினகரன், தினமலர், தினமணி என்று மூன்று நாளிதழ்களைப் போட்டுத் தாக்காமல் ஒரு பதிவு கூட வெளிவராது. தொட்டுக் கொள்ள தினத்தந்தி, குங்குமம் என்று வேறு சிலவும் மாட்டும். அக்கறை தென்படும் என்றாலும் அலசலும் இல்லாமல் விஷயம் மட்டுமும் இல்லாமல் half-baked analysis.

   மாணவர் குழாமில் அங்கத்தினர் நிறைய இருந்தாலும், அனைத்துப் பதிவுகளும், ஒரே தரத்தை ஒத்து இருப்பதாக பார்த்துக் கொண்டார்கள். வார்ப்புருவில் அச்செடுக்கப்பட்ட எண்ணங்களை தெளிவாக்கி, வலைப்பதிவுக்கேத் தேவையான லாவகத்துடன் வழங்கியிருந்தால் #1.

3. Hot machi hot: தமிழ்மணத்திலும் பட்டியலிடப்படாமல், சில நாளுக்கு முன்தான் புத்தம் புதியதாகத் துவங்கினாலும் பரவலான கவனிப்பைப் பெற்றுக்கொண்டது. பல பங்களிப்பார்கள் இருப்பதால் கன்ஸிஸ்டென்ஸி கிடைக்கவில்லை. இணையத்திற்கேற்ற ஆங்கிலம் + தமிழ் கலந்த துள்ளலான பதிவுகள். சுயமாய தயாரித்த சரக்கை சுவையாய் கொடுக்கிறார்கள்.
4. தமிழகத் தேர்தல் 2006: அமெரிக்கா, சிங்கப்பூர், கனடா (யாரு?) என்று உலகெங்கும் உள்ள சின்னத் திரைகளில் தேர்தல் கோலங்கள் கொடுப்பது எங்கள் ‘தேர்தல் 2006’. கூகிள் ஆதரவினால் சி.என்.என்., வெகுஜன ஊடகங்கள் என்று உலா வருகிறது. சில சமயம் ‘சுரதா’வினால் வெட்டி/ஒட்டப்பட்ட பத்திரிகை, நாளிதழ் செய்திகள், சிறு நக்கல்கள், வெகு அரிதாக ஒரிஜினல் கருத்துக்கள் தாங்கி வெளிவரும்.

   பத்து பேர் சேர்ந்து வடம் இருப்பதால் இன்னும் நிறைய வெரைட்டியாக, உடனுக்குடன் சுடச்சுட இற்றைப்படுத்தப்பட்டு, சொந்தக் கருத்துக்களுடன் வலம் வந்திருக்காதது ஏமாற்றம்.

5. ரஜினி ராம்கி: மனதில் பட்டதை எழுதியதால் authenticity உள்ள பதிவுகள். நம்பகத்தன்மை வரும் அளவிற்கு தற்போதைய நடப்புகளை சொல்லி அலசுபவர். எக்ஸ்பிரஸ் வேகத்தில் தரவுகள் உள்ளடங்கி இருப்பதால், எனக்கு சில கருத்துக்கள் விளங்காமல் போகும். இருந்தாலும் பாமர நடையில் நேரடிப் புகைப்படங்களோடும் காரசாரமான மறுமொழிகளுடனும் உலா கொடுப்பவர்.
6. லக்கி லுக் – மடிப்பாக்கம்: ஏப்ரல் மாசம்தான் துவக்கம். வெத்து வேட்டு, சும்மா டைம்பாஸ் என்று சொல்லிக் கொண்டாலும், sophisticated உள்ளடக்கம். தேர்தல் மீட்டிங் கவரேஜ், கருத்துக் கணிப்புகள் தொகுப்பு என்று வேகமாக புகழ் பெற்ற பதிவு. திமுக ஆதரவை வெளிப்படையாக முன்வைக்கிறது.
7. கோவி. கண்ணன்: போன மாசம் ஆரம்பிக்கப்பட்டு தமிழகத் தேர்தலை திறம்பட முன்னிறுத்தும் இன்னொரு முக்கிய பதிவு. கிண்டல் கேலிகள் மற்றும் அரசியல்கள் இருக்கும். தேர்தல் முடிவுகள் தொடரை தவறவிடாமல் படிக்க வேண்டும்.
8. மாயவரத்தான்: முற்போக்கு, பகுத்தறிவு, நடுநிலைமை, சிந்தனாவாதி போன்ற வலைப்பதிவு பட்டமளிப்புகளுக்கு மயங்காமல் அசத்துபவர். டாஸ்மாக் கடையின் விற்பனையாளன் மட்டும் சரக்கடிக்காதது போல் odd man out. மாற்றுக் கருத்துக்களை முகஞ்சுளிக்காமல் வரவேற்று, எதிர் கருத்து உள்ளவர்களுடனும் தொடர்ந்து விவாதிப்பார். தொகுதி அனாலிஸிஸ், ஆருடம் என்று கஷ்டப்படாமல் content கொடுப்பவர்.
9. அப்பிடிப்போடு: கரூர், கன்னியாகுமரி, நெல்லை, தூத்துக்குடி, இராமநாதபுரம், சிவகங்கை, விருதுநகர், தேனி, நாகை, திண்டுக்கல், தஞ்சை மாவட்டம் என்று நிறைய அலசி, எழுதியிருப்பதாகத் தெரிகிறது. நான் இன்னும் எந்த மாவட்டத்தையும் படிக்கவில்லை. முடிவு வந்தபிறகு என்னாச்சு என்று தெரிந்து கொண்டு விடலாம் என்னும் எண்ணமாகவும் இருக்கலாம்.
10. பத்ரி: இன்னும் நிறைய எதிர்பார்த்த பதிவர். காரம் படுகுறைவு. அரிசி மானியம் குறித்த விரிவான பதிவுகள் தவிர எவருக்கு ஓட்டு, தேர்தல் அறிக்கை அலசல் போன்ற பத்ரியுடைய ஸ்டாண்டர்ட் டச் கிடைக்காமல் போனதில் எனக்கு வருத்தம். மயிலாப்பூர் குறித்தாவது வாக்குறுதிகள், வேட்பாளர்கள், பிரச்சாரங்கள் என்று தீனி போட்டிருக்கலாம்.

பிகு: படு சேரியமாய் எழுதும் தமிழ் சசி, ரோஸாவசந்த், ரவி ஸ்ரீனிவாஸ், ‘உள்ளல்’ ஆதிரை, ‘திசைகள்’ மாலன் போன்ற பலரை சாய்ஸில் விட்டுவிடுகிறேன். ஓரிரண்டு முக்கியமான பதிவுகளில் அவர்களுடைய வழக்கமான இலச்சினையுடன் ஆழமாக தமிழகத் தேர்தலை அலசுவது, மேற்கண்ட தலை பத்து பதிவர்களின் தொடர்ச்சியான (அதாவது ஜனரஞ்சகமான) கவரேஜூக்கு ஈடாகாது.

பி. குறிப்பிடத்தக்க கருத்து:

ஊருங்க எல்லாத்தையும் ஒரு வெள்ள பேப்பர்ல எழுதிகோங்க. பக்கத்துலயே அந்த ஊர் வேட்பாளருங்க எல்லார் பேரும் எழுதிக்கோங்க. வேட்பாளருங்க பேர் தெரியாட்டாலும் ஒண்ணியும் ப்ரச்னை இல்ல.. திமுக கூட்டணி, அதிமுக கூட்டணின்னு பொதுவா எழுதிக்கோங்க.. அதுல உங்களுக்கு பிடிச்ச வேட்பாளர் அல்லது உங்க அய்யா, அம்மா, அப்பத்தா, தோட்டத்துல புல்லு புடுங்கற பெரிய மூக்கி, மாடு மேக்கிற கொண்ண வாயன் இவங்களுக்கு பிடிச்ச வேட்பாளர் பேர போல்டு பண்ணி ஹைலைட்டர் வச்சி கலர் அடிங்க.. ஆச்சா, முடிஞ்சிது தொகுதி அலசல். “என் கணிப்புப்படி”ன்னு எல்லாருக்கும் படிச்சி காமிங்க… காப்பிரைட் நன்றின்னு நம்ம பேர சொல்லிடுங்க..

தேர்தல் 2006 | TN Elections | தமிழ்ப்பதிவுகள்

சன் டிவியில் இப்போது தான் பார்த்தேன். “ஞாபகம் வருதே” படப்பாடலின் பிண்ணணியில் அ.தி.மு.க ஆட்சியில் நிகழ்த்தப்பட்டதாக சொல்லப்படும் அவலங்களை (கொல்றாங்க! கொல்றாங்க என்ற அற்புதமான வீடியோ ;)) கோர்வையாக்கி 15 நிமிடங்களுக்கு ஒரு முறை ஒளிபரப்புகிறார்கள். வெள்ளம் வந்த போது, அதிமுக அரசும், ஜெயலலிதாவும் ஒவ்வொரு வீட்டிற்கும் போயிருக்க வேண்டும் என்கிற தொனியினை விட மோசமாக சித்தரிக்கப்பட்டிருக்கும் தொகுப்பு இது. இது போன்ற ஊடக அசிங்கத்தினையும், அத்து மீறலையும் எந்த மாநிலத்திலும் காண இயலாது.

ஜெயா டிவியில் சோ.ராமசாமி, கருணாநிதியும், தி.மு.க கூட்டணியும், குடும்ப அரசியலையும் பற்றி பேசிக் கொண்டு இருக்கிறார். 1 இலட்சம் குடும்பங்கள் நடுத்தெருவில் கொண்டு வந்து நிற்கவைக்கப்பட்டதை மூச்சு விடவில்லை. தீவிரவாதத்தினை அடக்கல் என்கிற பாராட்டில், வை.கோவின் விடுதலைப்புலிகளின் ஆதரவினை ஒரெயடியாக கொல்கிறார். சோ பேசுவது அபத்த நகைச்சுவை வகையறா.

இது போக பத்ரி சொன்னது போல மிக மோசமாக எடிட் செய்யப்பட்ட விஜயகாந்தின் பிரச்சாரம், மூன்றாம்தர போர்னோ விடியோவினை விட மோசமாக இருக்கிறது. இதில் விவசாயிகளின் ஒரே சின்னம் என்று பேச்சு வேறு. இவர்கள் காவிரி பிரச்சனைக்காக போராடியதாக சொல்லி, நெய்வேலி சென்று அங்கே நடிகைகளையும், நடிகர்களையும் காட்டி விட்டு, போராடுவதாக சொல்லிவிட்டு, எஸ்கேப் ஆன கதையினை இன்னமும் தமிழக மக்கள் நினைவில் வைத்திருக்கிறார்கள் என்பதை “கேப்டன்” மனதில் நிறுத்துவது நல்லது.

இது தாண்டி, இன்றைய வணக்கம் தமிழகத்தில் இயக்குநர் சீமான் ஏன் கருணாநிதி தலைமையில் ஆட்சி அமைய வேண்டும் என்றும், சரத், வை.கோ பற்றியும் அளந்து கொண்டிருந்தார். சீமான் அவர்களே, 100 தமிழறிஞர்கள் வள்ளுவர் கோட்டத்தில் தமிழ்மொழிக்காக உண்ணாவிரதம் இருந்த போது, இதே கலைஞர் ஆட்சி தான் வேடிக்கை பார்த்துக் கொண்டிருந்தது. சீமான் ஒதுக்கி வைக்கும் வை.கோவும், திருமாவும் தான் கருணாநிதி வாய் மூடி பல பிரச்சனைகளில் இருந்த போது பேசியவர்கள். இன்றைக்கு தலித் ஒட்டு வங்கி அதிமுக பக்கம் சாய்ந்திருத்திகிறது என்றவுடன், பிற்படுத்தப்பட்ட, ஒடுக்கப்பட்ட மக்களின் ஒரே தலைவர் கருணாநிதி என்று முன்னிறுத்துகிறீர்கள், எச்சில் இலை சோறு வேண்டாம் என்று திருமா சொன்ன போது எங்கே போனது இந்த ரோஷம்.

ஆக ஒரு முழுமையான அபத்த நகைச்சுவை பெருநாடகம் தமிழகமெங்கும் நடந்தேறிக் கொண்டிருக்கிறது. அறிக்கைகள், ஊர்வலங்கள், கோஷங்கள், பேச்சுகள் பார்க்கும் போது ஊடி ஆலனின் பல படங்கள் நினைவுக்கு வருகின்றன. All the world is stage and everybody is an actor. ஷேக்ஸ்பியர் வாழ்க!