Daily Archives: ஜூலை 23, 2006

Webulagam : Tamil Nadu Budget 2006-07 salient features!

தமிழக அரசு நிதிநிலை அறிக்கை முக்கிய அம்சங்கள்
2006-07 ஆம் நிதியாண்டிற்கான தமிழக அரசின் திருத்தப்பட்ட நிதிநிலை அறிக்கையினை நிதியமைச்சர் பேராசிரியர் க. அன்பழகன் தமிழக சட்டப் பேரவையில் இன்று சமர்ப்பித்தார்.

“தெரிந்த இனத்தோடு தேர்ந்தெண்ணிச் செய்வார்க்கு
கரும்பொருள் யாதொன்று மில்”

தெளிந்து தேர்ந்த நண்பர்களுடன் சேர்ந்து ஆற்ற வேண்டிய செயலை ஆராய்ந்து தாமும் நன்கு சிந்தித்துச் செய்தால் ஆகாதது ஒன்றுமில்லை என்ற பொருளுடைய குறளைக் கூறி நிதியமைச்சர் அன்பழகன் தாக்கல் செய்த நிதிநிலை அறிக்கையின் முக்கிய அம்சங்கள் வருமாறு :

மதிப்பு கூட்டு வரி :

· 2007 ஆம் ஆண்டு ஜனவரி 1 ஆம் தேதி முதல் மதிப்பு கூட்டு வரி நடைமுறைப்படுத்தப்படும். இத்திட்டத்தின் கீழ் ஆண்டிற்கு 10 லட்சத்திற்கும் குறைவாக விற்பனை உள்ள சிறு வணிக நிறுவனங்களுக்கு விலக்கு.

வரி விலக்குகள் :

· பருப்பு, பயறு வகைகள், சமையல் எண்ணெய் மீதான வரி ரத்து. வருவாய் இழப்பு ரூ.110 கோடி.

· தேயிலை மீதான விற்பனை வரி 50 விழுக்காடு குறைப்பு.

· சிட்டா நூலிற்கு முழு வரி விலக்கு.

· எரி சாம்பலுக்கு விற்பனை வரி விலக்கு.

· தமிழ் மொழியில் தயாரிக்கப்பட்ட உரிமம் அளிக்கப்பட்ட மென்பொருட்களுக்கு விற்பனை வரி விலக்கு.

· சாம்பிராணிக்கு மீண்டும் விற்பனை வரி விலக்கு.

· அத்தாட்சி செய்யப்படாத அடகு, அடமான ஆவணங்களுக்கு முத்திரைத் தீர்வை செலுத்துவதில் இருந்து விலக்கு.

ஒட்டுமொத்த நிதிநிலை :

· 2006-07 – வருவாய் ரூ.38,731 கோடி.
· 2006-07 – செலவு ரூ.39,860 கோடி.
· வருவாய் பற்றாக்குறை ரூ.1,129 கோடி.
· நடப்பு நிதியாண்டின் கடன்களும், முன் பணங்களும் உள்ளிட்ட மூலதனச் செலவு ரூ.6,102 கோடி.
· ஒட்டுமொத்த நிதிப் பற்றாக்குறை ரூ.7,231 கோடி.
· 2005-06 ஆண்டு திருத்திய மதிப்பீடுகளின் படி ரூ.56,094 கோடி அளவிற்கு கடன் உள்ளது. இதற்கு ஒவ்வொரு மாதமும் செலுத்த வேண்டிய வட்டி ரூ.446 கோடி.

விவசாயிகள் நலன் :
· கூட்டுறவு வங்கிகளில் இருந்து விவசாயிகள் பெற்ற கடன்கள் ரூ.6,866 கோடியை தமிழக அரசு தள்ளுபடி செய்ததால் நபார்டு வங்கிக்கு செலுத்த வேண்டிய ரூ.1,668 கோடியில் இந்த நிதியாண்டில் ரூ.438 கோடி செலுத்துவதற்கு நிதி ஒதுக்கீடு செய்யப்பட்டுள்ளது.

· கூட்டுறவு வங்கிகளுக்கு இதனால் ஏற்படும் இழப்பை ஈடுகட்டும் வகையில் இந்த ஆண்டு ரூ.1,000 கோடி நிதி ஒதுக்கீடு செய்யப்பட்டுள்ளது. ஆக மொத்தம், விவசாயிகளின் கூட்டுறவுக் கடன்களை தள்ளுபடி செய்யும் திட்டத்திற்காக இந்த ஆண்டில் மட்டும் ரூ.1,435 கோடி ஒதுக்கீடு செய்யப்பட்டுள்ளது.

· நடப்பு குறுவை சாகுபடி காலத்தில் இருந்து கூட்டுறவு வங்கிகளின் மூலமாக வழங்கப்படும் பயிர்க் கடன்களுக்கு தற்பொழுதுள்ள 9 விழுக்காடு வட்டி விகிதம் 7 விழுக்காடாக குறைக்கப்படும். இதனால் கூட்டுறவு வங்கிகளுக்கு ஏற்படும் இழப்பை அரசே ஏற்கும்.

· தமிழ்நாட்டில் இந்த ஆண்டு ஒட்டுமொத்த உணவு உற்பத்தி 95 லட்சம் மெட்ரிக் டன்னாக உயரும் என்று எதிர்பார்க்கப்படுகிறது. 2005-06 ஆண்டிற்கான நிதிநிலை அறிக்கையில் வேளாண்மை மற்றும் தொடர்புடைய இனங்களுக்கு ரூ.854.41 கோடியாக இருந்த மொத்த ஒதுக்கீடு 2006-07 நிதியாண்டில் ரூ.977.98 கோடியாக உயர்த்தப்பட்டுள்ளது.

· விவசாயிகள் உற்பத்தி செய்யும் பொருட்களுக்கு உரிய விலை கிடைக்கவும், இடைத்தரகர் இன்றி குறைந்த விலையில் நுகர்வோர் காய்கறிகளை பெறவும் உருவாக்கப்பட்ட 103 உழவர் சந்தைகளும் மீண்டும் திறம்பட செயல்படும்.

· விவசாயிகளின் உற்பத்திப் பொருட்களுக்கு விரயம் இன்றியும், உரிய விலை கிடைக்கும் வகையிலும் உலகத் தரம் வாய்ந்த சேகரிப்பு மையங்கள், குளிர்விக்கும் சாதனங்கள், தரம் பிரிப்பு, பதப்படுத்துதல் மற்றும் மின்னணு ஏல முறை உள்ளிட்ட அனைத்து வசதிகளுடன் கூடிய 3 வணிக மையங்கள் (கூநசஅiயேட ஆயசமநவள) சென்னை, கோவை, மதுரை ஆகிய பெருநகரங்களில் அமைக்கப்படும்.

· கோவை மாட்டம் பல்லடத்தில் வெங்காயத்திற்கும், கிருஷ்ணகிரி மாவட்டத்தில் மாம்பழத்திற்கும், தேனி மாவட்டம் ஓடைப்பட்டியில் திராட்சைப் பழங்களுக்கும் ஏற்றுமதிக்கு ஏற்ற வகையில் குளிர்பதன வசதிகளுடன் கூடிய விற்பனை கூட்டமைப்புகள் ஏற்படுத்தப்படும்.

· தரிசு நிலங்களில் முந்திரி சாகுபடியை ஊக்குவித்து ஏற்றுமதியை அதிகப்படுத்த கடலூர், தஞ்சை, பெரம்பலூர், புதுக்கோட்டை, சிவகங்கை ஆகிய மாவட்டங்கள் அடங்கிய முந்திரி விளை நில ஏற்றுமதி மண்டலத்தின் பணிகள், முந்திரி விவசாயிகளுக்கு மேலும் பயன்தரக்கூடிய வகையில் செம்மைப் படுத்தப்படும்.

· உயிரி எரிபொருள் (எத்தனால்) பெட்ரோலிற்கு மாற்றாகவும், பயோ டீசல், டீசலிற்கு மாற்றாகவும் பயன்படுகிறது. முதல் கட்டமாக பெட்ரோலுடன் எத்தனால் உயிரி எரிபொருளை 5 விழுக்காடு கட்டாயமாகக் கலந்து பயன்படுத்த மத்திய அரசு ஆணையிட்டுள்ளது. எனவே, அத்தனை சக்கரை ஆலைகளிலும் எத்தனால் உற்பத்தி செய்வதற்கான வசதியை ஏற்படுத்த நடவடிக்கைகள் எடுக்கப்படும். சர்க்கரைச் சோளம், சர்க்கரைக் கிழங்கு மூலமும் எத்தனால் தயாரிக்கலாம் என்பதனால் இவைகளை பயிர் செய்ய விவசாயிகளுக்கு ஊக்கமளிக்கப்படும்.

· ஜெட்ரோப்பா எனப்படும் காட்டாமணக்கு விதையிலிருந்து எடுக்கப்படும் எண்ணெய் பயோ டீசலாக, டீசலிற்கு மாற்றாக பயன்படும் என்பதால் தரிசு நிலங்களில் காட்டாமணக்கு விளைவிக்க ஊக்குவிக்கப்படும்.

· அரசு புறம்பபோக்கு தரிசு நிலங்களை விவசாயத்திற்கு பயன்படும் வகையில் மேம்படுத்தி நிலமற்ற ஏழை விவசாய குடும்பங்களுக்கு தலா 2 ஏக்கர் வழங்கப்படும்.

· அதே நேரத்தில் மொத்தமாக தரிசு நிலம் வைத்திருக்கும் ஏழை விவசாயக் குடும்பங்களைப் பொறுத்தவரை, அந்நிலங்களை மேம்படுத்தி விவசாயத்திற்கு ஏற்ற நிலமாக மாற்றித் தரவேண்டும் என்று அவர்கள் கேட்டுக் கொண்டால், அரசு செலவில் மேம்படுத்தி விவசாயத்திற்கு ஏற்ற நிலங்களாக மாற்றி அவர்களிடமே திருப்பி அளிக்கப்படும்.

· விவசாய தொழிலாளர் நல வாரியம் மீண்டும் ஏற்படுத்தப்பட்டு விவசாயத் தொழிலாளர்களின் சமூக பாதுகாப்பு உறுதி செய்யப்படும். இத்திட்டத்தின் கீழ் விவசாயிகளுக்கும், விவசாயத் தொழிலாளர்களுக்கும் வழங்கப்படவுள்ள சலுகைகள் (தனி செய்தியாக அளிக்கப்பட்டுள்ளது).

கால்நடை வளர்ப்பு :
· கோழி மற்றும் முட்டை உற்பத்தியில் தமிழகம் அகில இந்திய அளவில் முன்னணி மாநிலமாகத் திகழ்கிறது. இவ்வகையில் நாமக்கல் கால்நடை மருத்துவக் கல்லூரி மற்றும் ஆராய்ச்சி நிறுவனத்தில் பறவைகளினால் ஏற்படும் நோய் குறித்த ஆய்வுக் கூடம் அமைக்கப்படுவதுடன், நாகப்பட்டினம், கரூர், விருதுநகர், கிருஷ்ணகிரி மாவட்டங்களில் கால்நடை நோய்கள் குறித்த நுண்ணறிவுப் பிரிவுகள் ஏற்படுத்தப்படும்.

பாசன மேம்பாடு

பொது விநியோகத் திட்டம் :

· பொது விநியோகத் திட்டத்தின் கீழ் வழங்கப்படும் பொருட்களுக்கு இந்த நிதியாண்டில் மட்டும் 1950 கோடி உணவு மானியமாக நிதி ஒதுக்கீடு செய்யப்பட்டுள்ளது.

· பொது விநியோகத் திட்டத்தின் கீழ் அளிக்கப்படும் அரிசி போன்ற உணவுப் பொருட்களை கடத்தி கொள்ளையடிக்கும் குற்றவாளிகள் மீது குண்டர் சட்டம் பாயும்.

உள்துறை :

· காவலர்கள் குறை தீர்க்க 3வது காவல்துறை ஆணையம் அமைக்கப்படும்.

· காவல்துறையை நவீனமயமாக்க ரூ.68 கோடி ஒதுக்கீடு செய்யப்பட்டுள்ளது.

· தீயணைப்பு மற்றும் மீட்புப் பணிகள் துறைக்கு ரூ.23 கோடி மதிப்பீட்டில் சிறப்வு வாகனங்கள் மற்றும் தீயணைப்பு வண்டிகள் வாங்கப்படும்.

· வாகன ஓட்டிகள் குடி போதையில் இருந்தது கண்டுபிடிக்கப்பட்டால் அவர்களுக்கு கடுமையான தண்டனை வழங்கவும், ஓட்டுநர் உரிமத்தையே ரத்து செய்யவும் நடவடிக்கை மேற்கொள்ளப்படும்.

நீதித்துறை :
· உயர் நீதிமன்றத்தில் பணியாற்றும் அரசு வழக்கறிஞர்களுக்கான தனியாக ஒரு கட்டடம் ரூ.2.03 கோடி மதிப்பீட்டில் உயர் நீதிமன்ற வளாகத்திலேயே கட்டப்படும்.

· மண முறிவு வழக்கு சம்பந்தப்பட்ட குடும்பங்களுக்கு ஆலோசனை வழங்க, குடும்ப நல நீதிமன்றங்கள் ஒவ்வொன்றிலும் இரு முழு நேர ஆலோசகர்கள் நியமிக்கப்படுவர்.

· சென்னை உயர் நீதிமன்றத்தின் மதுரை கிளைக்குத் தேவையான 350 பணியிடங்களுக்கான ஒப்புதல் வழங்கப்படும்.

· நீதி நிர்வாகத்திற்காக இந்த நிதியாண்டில் ரூ.212.9 கோடி ஒதுக்கப்படும்.

பள்ளிக் கல்வி :
· அனைத்துப் பள்ளிகளிலும் இந்த ஆண்டிலேயே முதலாம் வகுப்பில் தமிழ் ஒரு பாடமாக கற்பிப்பது தொடங்கும். இது வரும் ஆண்டுகளில் படிப்படியாக 10 ஆம் வகுப்பு வரை விரிவுபடுத்தப்படும்.

· அரசு மற்றும் அரசு உதவி பெறும் பள்ளிகளில் ஒப்பந்த முறையில் தொகுப்பூதிய அடிப்படையில் பணியாற்றிய சுமார் 45,987 ஆசிரியர்களுக்கு 01.06.2006 முதல் காலமுறை ஊதியம் வழங்கப்படும். இனி வரும் காலங்களிலும் ஆசிரியர் காலியிடப் பணியிடங்கள் காலமுறை ஊதிய அடிப்படையிலேயே நிரப்பப்படும்.

· தி.மு.க. ஆட்சியில் தொடங்கப்பட்ட மாணவர்கள் இலவச பஸ் பாஸ் திட்டமும், கடந்த ஆட்சியில் தொடங்கப்பட்ட இலவச மிதிவண்டிகள் வழங்கும் திட்டத்தையும் இந்த அரசு தொடர்ந்து நிறைவேற்றும்.

· 10 ஆம் வகுப்பு, 12 ஆம் வகுப்பு முடித்துச் செல்லும் போதே மாணவர்களுக்கு சாதிச் சான்றிதழ்கள், வாழ்விடச் சான்றிதழ்கள், குடும்ப வருமானச் சான்றிதழ்கள் ஆகியன வழங்கும் திட்டம் மீண்டும் நடைமுறைக்கு வரும்.

· பள்ளிக் கல்வித் துறைக்கு இந்த நிதியாண்டில் ரூ.5,438.88 கோடி ஒதுக்கீடு செய்யப்பட்டுள்ளது.

· மத்திய அரசு உதவியுடன் தொடங்கப்பட்டுள்ள அனைவருக்கும் கல்வித் திட்டம் ரூ.723.18 கோடி மதிப்பீட்டில் செயல்படுத்தப்படும். இதற்காக மாநில அரசின் பங்காக ரூ.180.80 கோடி ஒதுக்கப்பட்டுள்ளது.

உயர் கல்வி :
· பொது நுழைவுத் தேர்வை 2007-08 ஆம் ஆண்டு முதல் அகற்றிட கல்வியாளர்கள் கொண்ட குழு.

· அரசு பொறியியல் மற்றும் கலைக் கல்லூரிகளில் சுயநிதி அடிப்படையில் நடத்தப்பட்டு வரும் அனைத்துப் பாடப் பிரிவுகளையும் பொதுவகை கட்டணம் செலுத்தும் பாடப் பிரிவுகளாக மாற்றுவதற்கு ஆணை பிறப்பிக்கப்பட்டுள்ளது.

· அண்ணா பல்கலைக் கழகத்தைப் போன்ற தொழில்நுட்ப பல்கலைக்கழகங்கள் திருச்சியிலும், கோவையிலும் நிறுவப்படும்.

· பின் தங்கிய பகுதிகளின் கல்வி வளர்ச்சிக்காக கோவை மாவட்டம் வால்பாறையிலும், சேலம் மாவட்டம் மேட்டூரிலும் கலை அறிவியல் கல்லூரிகள் தொடங்கப்படும்.

· மதுரை காமராஜர் பல்கலைக்கழகத்தில் கல்வித்துறையில் ஆராய்ச்சி மேற்கொள்ள கல்வியியல் ஆய்வு மையம் அமைக்கப்படும்.

· ஊரகப் பகுதிகளில் பல் மருத்துவக் கல்லூரிகள், செவிலியர் கல்லூரிகள், உடல் இயக்க மருத்துவக் கல்லூரிகள் அமைக்கப்படும்.

· சென்னை பல்கலைக்கழக வளாகத்தில் திராவிட இயக்க ஆய்வு மையம் நிறுவப்படும்.

மக்கள் நல்வாழ்வு மற்றும் குடும்ப நலன் :
· வருமுன் காப்போம் திட்டத்தின் கீழ் நடப்பு ஆண்டிலும், வரும் ஆண்டிலும் 9,000 இலவச மருத்துவ முகாம்கள் நடத்தப்படும். இதற்காக ரு.13.13 கோடி ஒதுக்கீடு.

· 235 அரசு மருத்துவமனைகளில் நவீன மருத்துவச் சாதனங்களுக்கு ரூ.70 கோடி ஒதுக்கப்படும். 14 மாவட்டங்களில் உள்ள கிராமப் பகுதிகளுக்கு 198 அவசர ஊர்திகள் வழங்கப்படும். 32 அரசு மருத்துவமனைகள் 24 மணி நேர அவசர மற்றும் சிசு கவனிப்பு மையங்களாக தரம் உயர்த்தப்படும்.

· தமிழகத்தில் உள்ள 1,417 ஆரம்ப சுகாதார நிலையங்களுக்கும் செமி ஆட்டோ அனலைசர் கருவிகள் ரூ.17 கோடி செலவில் வழங்கப்படும்.

· திருநெல்வேலி, தஞ்சாவூர், திருச்சி, கோவை, வேலூர் அரசு மருத்துவமனைகளில் ரூ.23.95 கோடி செலவில் எம்.ஆர்.ஐ. ஸ்கேன் மையங்கள் அமைக்கப்படும்.

· சென்னை பொது மருத்துவமனையில் ரூ.5.5 கோடி செலவில் அதி நவீன 64 ஸ்லைஸ் சி.டி. ஸ்கேனர் அமைக்கப்படும்.

· மருத்துவக் கல்லூரி இல்லாத மாவட்டங்களில் புதிதாக அரசு மருத்துவக் கல்லூரிகள் தொடங்கப்படும் என்று தேர்தல் அறிக்கையில் குறிப்பிட்டதற்கு இணங்க விழுப்புரத்தில் அரசு மருத்துவக் கல்லூரி தொடங்கப்படும்.

தொழில் வளர்ச்சி

தகவல் தொழில்நுட்பம் :
· சென்னை தரமணியில் 2வது டைடல் பூங்கா அமைப்பதற்கான முடிவெடுக்கப்பட்டுள்ளது.

· தமிழகத்தில் தகவல் தொழில்நுட்பத் துறையில் அதிக முதலீடுகளை ஈர்ப்பதற்குத் தேவையான பல்வேறு கட்டமைப்பு வசதிகளை செய்வது குறித்து அரசிற்கு பரிந்துரைகள் அளிக்க இத்துறையின் பிரதிநிதிகளைக் கொண்ட மாநிலத் தகவல் தொழில்நுட்பக் குழு அமைக்கப்படும்.

· முதற்கட்டமாக 30,000 வண்ணத் தொலைக்காட்சிப் பெட்டிகளை வழங்க இந்த நிதியாண்டில் ரூ.750 கோடி ஒதுக்கீடு செய்யப்பட்டுள்ளது.

· சிறு தொழில்களுக்கு முதலீட்டு மானியம் வழங்க நடவடிக்கை எடுக்கப்படும். இதற்காக ரூ.11 கோடி ஒதுக்கீடு செய்யப்பட்டுள்ளது.

சாலைகள் மற்றும் நெடுஞ்சாலை மேம்பாடு :
· சாலை பராமரிப்புப் பணிகளுக்கு மட்டும் ரூ.804 கோடி ஒதுக்கீடு செய்யப்பட்டுள்ளது. சாலைகள் மற்றும் பாலங்களுக்கான மூலதன ஒதுக்கீடுகளுக்கென ரூ.2,461 கோடி என்ற உயர் அளவிற்கு நிதி ஒதுக்கீடு செய்யப்பட்டுள்ளது.

· மதுரை மாநகரப் பகுதியின் போக்குவரத்து நெரிசலை குறைக்கும் பொருட்டு மதுரை ஆரச்சாலையின் 2வது கட்டப் பணிகள் ரூ.70 கோடி மதிப்பீட்டில் செயல்படுத்தப்படும்.

· திருப்பூர் நகரத்தின் போக்குவரத்தை மேம்படுத்த ரூ.70 கோடி மதிப்பீட்டில் அந்நகரத்தின் வட்டச்சாலை மற்றும் அணுகு சாலைகள் மேம்படுத்தப்படும்.

மின் சக்தி :
· இந்த ஆண்டின் தொடக்கத்தில் தமிழ்நாட்டின் மின் உற்பத்தி நிறுவு திறன் 10,011 மெகா வாட்டாகும். இந்த ஆண்டில் 749 மெகா வாட் அளவிற்கு கூடுதலாக மின் உற்பத்தித் திறன் நிறுவப்பட்டு மொத்த மின் உற்பத்தி நிறுவு திறன் 10,760 மெகா வாட்டாக உயரும்.

· ஊரகப் பகுதிகளில் தடையின்றி மின்சாரம் விநியோகிக்கப்படுவதை உறதி செய்ய தமிழ்நாடு மின் வாரியம் இந்த நிதியாண்டில் ரூ.195.54 கோடி மதிப்பீட்டில் மின் பகிர்மான திட்டங்களை மேற்கொள்ளும்.

· ஊரகப் பகுதிகளில் 25 புதிய துணை மின் நிலையங்கள் மற்றும் 2,706 புதிய மின் பகிர்வு மின் அழுத்தமாற்றிகள் நிறுவப்படும். 24 துணை மின் நிலையங்களின் மின் அழுத்தமாற்றிகளின் திறன் அதிகரிக்கப்படும்.

· சுயநிதி திட்டத்தின் கீழ் சிறப்புத் தொகை கட்டி மின் இணைப்பு பெற்ற 2,40,000 விவசாய மின் இணைப்புகளுக்கும் இனி இலவச மின்சாரம் வழங்கப்படும்.

போக்குவரத்து :

· நடப்பாண்டில் 1,000 புதிய பேருந்துகள் வாங்குவதற்காக அரசுப் போக்குவரத்துக் கழகங்களுக்கு ரூ.100 கோடி ஒதுக்கீடு செய்யப்பட்டுள்ளது.

· 1997 ஆம் ஆண்டு அறிமுகப்படுத்தப்பட்ட மினி பேருந்து திட்டம் விரிவுபடுத்தப்படும்.

· திருப்பெரும்புதூரில் ராஜீவ் காந்தி விமானவியல் உயர் கல்வி மற்றும் விமான ஓட்டிகள் பயிற்சிக் கழகம் அமைக்கப்படும்.

சென்னை பெருநகர் வளர்ச்சித் திட்டம் | குடி நீர் வழங்கல்

சுனாமி சீரமைப்பு, மறுவாழ்வுப் பணிகள் :
· சுனாமி சீரமைப்பு மற்றும் மறுவாழ்வுப் பணிகளை மேற்கொள்வதற்கென இந்த ஆண்டில் மேலும் ரூ.100 கோடி செலவிடப்படும்.

முதியோர் மற்றும் ஆதரவற்றோர் நலன் :
· முதியோர், கணவனால் கைவிடப்பட்டோர், ஆதரவற்ற விதவைகள், ஊனமுற்றோர் ஆகியோருக்கு மாதற்தோறும் வழங்கப்படும் உதவித் தொகை ரூ.200ல் இருந்து ரூ.400 ஆக உயர்த்தப்படும். இதற்காக ரூ.407.06 கோடி ஒதுக்கீடு.

· கடும் ஊனமுற்றோருக்கு வழங்கப்பட்டு வரும் மாதாந்திர உதவித் தொகை ரூ.200ல் இருந்து ரூ.500 ஆக உயர்த்தப்படும்.

· மாநில அளவிலும், மாவட்ட அளவிலும் முதல் 3 நிலைகளைப் பெறக்கூடிய கண் பார்வையற்ற மாணவ, மாணவியருக்கு பரிசுத் தொகை வழங்குவதுடன் அவர்களுடைய உயர் கல்விச் செலவையும் அரசே ஏற்கும்.

நெசவாளர் நலன் | மீனவர் நலன் | ஆதி திராவிடர், பழங்குடியினர் நலன் | இலங்கைத் தமிழர்

Kalki Weekly Magazine’s Thalayangam

சின்ன விஷயங்களும் பெரிய தலைவர்களும்…

‘‘சின்ன விஷயங்களைப் பெரிதாக்க வேண்டாம்; பெரிய விஷயங்களில் ஆழ்ந்த கவனம் செலுத்துங்கள்’’

என்று முதல்வர் கருணாநிதி தமது சக அரசியல்வாதிகளை நோக்கிப் பேசியிருக்கிறார். மிக உயர்ந்த அறிவுரை இது. நாட்டில் கல்வியின்மை, வறுமை, வேலை வாய்ப்பின்மை, அடிப்படை வசதிகளின்மை, பயங்கரவாதம், வன்முறை… என பெரிய பெரிய பிரச்னைகள் காத்திருக்க, அவற்றைப் புறக்கணித்துவிட்டு உப்பு பெறாத விஷயங்களை ஊதிப் பெரிதாக்கி, அரசியல் ஆதாயம் தேடுவதென்பது நமது அரசியல் கலாசாரமாகவே மாறிவிட்டது.

துரதிர்ஷ்டவசமாக, அறிவுரை சொல்லும் முதல்வரும் இந்தக் கலாசாரத்தில் சிக்கியிருக்கிறார். தமது அறிவுரையைத் தாமே கடைபிடிப்பதில் அவர் முனைப்புக் காட்டாததால்தான் இன்று சிவாஜி கணேசன் சிலை நிர்மாணம் சர்ச்சையில் சிக்கி, நீதிமன்றத்தில் அல்லாடிக் கொண்டிருக்கிறது.

சென்னையில் நடிகர் திலகத்துக்குச் சிலை வைக்கத் தகுதியான இடங்கள் ஏராளமாக இருக்கின்றன. அவற்றை விடுத்து, சாலைப் போக்குவரத்துக்கு இடைஞ்சலாகவும் ஏற்கெனவே நிறுவியுள்ள காந்தி சிலையின் தோற்றத்தைப் பாதிக்கும் விதமாகவும் சிவாஜி சிலைக்கு இடம் தேர்வாக, இதனை எதிர்த்து நீதிமன்றத்தில் வழக்கு போடப்பட்டிருக்கிறது. ‘வழக்கு விவகாரமெல்லாம் எதற்கு, இது சிறிய விஷயம்; சென்னையில் எத்தனையோ மாற்றிடங்கள் உண்டு’ என்று தமிழக அரசு உடனடியாக வேறு இடம் பார்த்திருக்கலாம். வழக்கு ரத்தாகியிருக்கும்; சர்ச்சை ஓய்ந்திருக்கும். ஆனால், அதற்குப் பதில் நீதிமன்றத்தில் மோதலுக்கு வழிவகை செய்துள்ளது தமிழக அரசு!

கோயில்களில் பூர்ண கும்ப மரியாதை செய்வது, பரிவட்டம் கட்டுவது போன்றவை கர்ண பரம்பரையாக விளங்கி வரும் சின்னச் சின்ன பழக்க வழக்கங்கள். உபயதாரர் அல்லது கட்டளைதாரர், நன்கொடையாளர் போன்றவர்களுக்குச் செய்யப்படும் இந்தப் பாரம்பரிய மரியாதையை வர்க்க பேதத்தின் அடையாளமாகக் கருதி, அதனைத் தடை செய்தது அரசு. இந்தச் சின்ன விஷயத்தில் அரசு தலையிட்டதால்தான் இதுவும் பெரிய விவகாரமாகி அனைவர் கவனத்தையும் கவர்ந்தது. சில தினங்களில், முதல்வர் பின்வாங்கி,

‘‘மடாதிபதிகள், ஆதீனங்களுக்குப் பூர்ணகும்ப விஷயத்தில் விதி விலக்கு’’

என்றும் அறிவிக்கச் செய்திருக்கிறார். இதுபோன்ற மதம் சார்ந்த, வழிபாடு சார்ந்த விஷயங்களில் அரசாங்கத்தின் தலையீடு அவசியமற்றது என்பதுடன் நேர விரயமும்கூட. ஆனால், இங்கே அரசியல் ஆதாயம் கருதி சின்ன விஷயத்துக்குப் ‘பெரிய’ மாயத் தோற்றம் பூசப்படுகிறது.

உண்மையிலேயே கவனம் பெற வேண்டிய மிகப்பெரிய விஷயமோ, மிக அற்பமான விஷயம் போல அலட்சியத்துக்கு உள்ளாகி மோசமான பின்விளைவுகளை ஏற்படுத்துகிறது. என்.எல்.ஸி. பங்குகள் விற்பனை குறித்த அமைச்சரவைக் கூட்டத்தில் தி.மு.க. அமைச்சர்கள் யாருமே கலந்து கொள்ளவில்லை. இதனை ஒப்புக்கொண்ட டி.ஆர்.பாலு, ‘‘கூட்டத்தின் முடிவை ஏற்பது தவிர எங்களுக்கு வேறு வழியில்லை’’ என்று பேசியுள்ளார். இந்தப் பெரிய விஷயத்தில் தி.மு.க. தலைவரும் அக்கட்சியின் மத்திய அமைச்சர்களும் கவனம் செலுத்தத் தவறியதால் ஏகப்பட்ட கிளர்ச்சி, குழப்பம். இறுதியில் தி.மு.க. தலைவர் மத்திய அரசை அச்சுறுத்த, பிரதமர்தான் அவமானத்தையும் தலைகுனிவையும் சந்திக்க வேண்டி வந்தது.

‘சின்ன விஷயங்களைப் பெரிதுபடுத்த வேண்டாம்’ என்று முதல்வர் கூறியதன் பின்னணியையே எடுத்துக் கொண்டாலும், சட்டசபையில் ஆளுங்கட்சி முதல்வரும் எதிர்கட்சித் தலைவரும் எதிரெதிராக அமர்வது மரபு. அவ்வாறே எதிர்கட்சித் தலைவர்களும் ஆளுங்கட்சி அமைச்சர்களும். திடீரென்று இருக்கைகள் இடம் மாற்றப்படுகின்றன. எதிர்கட்சியினர் பலர் முதல்வரைப் பார்க்க முடியாது. ஆளுங்கட்சியினர் பலர் எதிர்கட்சித் தலைவரைக் காண முடியாது. ‘‘இதில் உள் நோக்கம் இல்லை; சின்ன விஷயம். அவைத் தலைவரின் கட்டுப்பாட்டில் உள்ள விஷயம்’’ என்று முதல்வர் வாதாடுகிறார். முதல்வர் கூறுவதுபோல் சின்ன விஷயமாயின்

‘மரபுகளை மீறி இடமாற்றம் செய்வானேன்…? அம்மாற்றத்துக்கு உள்நோக்கம் கற்பிக்கப்பட இடமளிப்பானேன்?’

என்ற கேள்வியும் எழத்தானே செய்கிறது!

Aaraamthinai.com

உள்ளாட்சி தேர்தலும் அவசர சட்டமும்! :: கேடிஸ்ரீ

மறுபடியும் ஒரு தேர்தலை சந்திக்கவிருக்கிறது தமிழகம். வரும் அக்டோபர் மாதத்துடன் தற்போதைய உள்ளாட்சி அமைப்புகளின் பதவிக்காலம் முடிவடைவதையொட்டி தமிழக அரசுக்கு உள்ளாட்சி தேர்தலை அக்டோபர் மாதத்திற்குள் முடித்துவிடுவதற்கான கட்டாயம் ஏற்பட்டுள்ளது.

இத்தேர்தலை மனதில் கொண்டு தமிழக முக்கியக் கட்சிகள், பல்வேறு மட்டங்களில் அதிரடியான மாற்றங்களை தங்கள் கட்சிக்குள் செய்து வருகின்றன. அதுமட்டுமல்லாமல் உள்ளாட்சி தேர்தலில் கணிசமான இடங்களை கைப்பற்றும் விதத்தில் தங்களுக்கான வியூகங்களையும் வகுத்து வருகிறது.

முன்னதாக முக்கிய எதிர்க்கட்சியான அ.தி.மு.க நடந்து முடிந்த சட்டப்பேரவை தேர்தலுக்குப் பின் கட்சியின் பல்வேறு மாவட்ட நிர்வாகிகளையும், செயலர்களையும் அதிரடியாக மாற்றியமைத்து வர எண்ணியது. இதன் விளைவாக அ.தி.மு.க பொதுச்செயலர் ஜெயலலிதா கட்சியில் பல்வேறு அதிரடி நடவடிக்கைகளை தற்போது செய்து வருகிறார். ஒருபுறம் இதுவரை ஒதுங்கியிருந்த பலருக்கு முக்கிய பொறுப்புகளை வழங்கி அதிர்ச்சி அளித்திருக்கிறார் என்றால் மறுபுறம் முந்தைய அ.தி.மு.க அரசின் அமைச்சராக இருந்த பாண்டுரங்கன், தென் செனனை மாவட்டத் தலைவராக இருந்த ஆதிராஜாராம் போன்றவர்களை அப்பதவியிலிருந்து நீக்கி அதிர்ச்சி அளித்திருக்கிறார். முன்னாள் அமைச்சர் செம்மலைக்கு முக்கிய பொறுப்பு அளித்து அவரை திகைப்பில் ஆழ்த்தியிருக்கிறார். அதிரடி நடவடிக்கைகளும், களையெடுப்பும் தொடர்ந்து நடைப்பெற்று வருகின்றன.

கடந்த ஐந்தாண்டுகளுக்கு முன்பு நடைப்பெற்ற உள்ளாட்சி தேர்தலில் விஜயகாந்த் ரசிகர் மன்றத்தினர் கணிசமான அளவிற்கு இடங்களை கைப்பற்றிய நிலையில் தற்போது விஜயகாந்த் அரசியல் கட்சி தொடங்கியப் பிறகு நடைபெறவிருக்கும் முதல் உள்ளாட்சி தேர்தல் இது. இத்தேர்தலில் எப்படியாவது அதிகளவில் இடங்களை கைப்பற்ற வேண்டும் என்பதில் தீவிரமான கவனம் செலுத்தி வருகிறார். சுமார் 30 வருடங்களுக்குப் பிறகு நடைபெற்ற பாண்டிச்சேரி உள்ளாட்சி தேர்தலில் விஜயகாந்த்தின் தேசிய முற்போக்கு திராவிட கழகம் காரைக்கால் நகராட்சியை கைப்பற்றியது அக்கட்சியினரிடையே மிகுந்த உற்சாகத்தை ஏற்படுத்தியிருக்கிறது.

தி.மு.க தலைமையிலான கூட்டணி கட்சிகள் வருகிற உள்ளாட்சி தேர்தலிலும் தங்கள் கூட்டணியை அப்படியே தொடர முடிவு செய்துள்ளன. ம.தி.மு.க, விடுதலை சிறுத்தை போன்ற அ.தி.மு.க. கூட்டணி கட்சிகளும் அ.திமு.கவுடனான தங்களது கூட்டணி உள்ளாட்சி தேர்தலிலும் தொடரும் என்று அறிவித்துள்ளன.

இந்நிலையில் கடந்த வாரம் தமிழக அரசு உள்ளாட்சி அமைப்புகளுக்கான அவசர சட்டம் ஒன்றை பிறப்பித்துள்ளது. இந்த அவசர சட்டத்திற்கு ஆளுநர் பர்னாலாவும் ஒப்புதல் அளித்துள்ளார். மேயர் மற்றும் துணை மேயரை கவுன்சிலர்களே தேந்தெடுக்கும் விதத்தில் இச்சட்டம் வழிவகைச் செய்கிறது. அதுமட்டுமல்லாமல்

மேயர் அல்லது துணை மேயர்களின் செயல்பாடுகள் திருப்தியில்லாதபட்சத்தில் அவர்கள் மீது கவுன்சிலர்கள் நம்பிக்கையில்லா தீர்மானத்தை கொண்டுவருவதற்கும் இச்சட்டம் வழிவகைச் செய்கிறது.

இதுவரை மேயர் மற்றும் துணைமேயர்களை மக்களே தேர்ந்தெடுத்து வந்தனர். இந்த அவசர சட்டம் மூலம் அந்த முறை மாற்றப்பட்டுள்ளது. மக்களால் நேரடியாக தேர்ந்தெடுக்கப்படும் மேயரோ அல்லது நகராட்சித் தலைவரோ வீற்றிருக்கும் மன்றத்தில் அவரது கட்சியை சேராத அதிக மன்ற உறுப்பினர்கள் இடம் பெற்றிருந்தால் அந்த மேயரோ அல்லது தலைவரோ அந்த கூட்டத்தை சுமூகமாக நடத்தி செல்வதில் மிகவும் சிரமத்திற்குள்ளாவது தவிர்க்க முடியாததாகிவிடுகிறது.மேலும் அங்கு எந்த ஒரு திட்டத்தையும் செயல்படுத்த முடியாத சூழல் உருவாகிறது. இதனைக் கருத்தில் கொண்டு பார்க்கிற போது இந்த அவசர சட்டம் வரவேற்கபடுகிற ஒன்று.

ஆனால் கட்சி சார்பில்லாமல் அந்தந்த ஊர்களில் – அந்தந்த இடங்களில் இருக்கும் செல்வாக்கு மிக்கவர்கள் நேரிடையாக தலைவராக இனி வருவதை இந்த வகையான சட்டம் தடுக்கும் என்பது இதில் உள்ள பாதகமான அம்சம் எனலாம். இதனால் எல்லா இடங்களிலும் கட்சிகளின் ஆதிக்கம் வளர்வதற்கு ஏதுவாக இருக்கும்.

தமிழகத்தில் 500க்கும் குறைவான மக்கள் தொகை கொண்ட சிறப்பு நிலை பஞ்சாயத்துக்கள் 561ஐ தற்போது பேரூராட்சிகளாக மாற்றவும் அவசர சட்டம் கொண்டு வரப்பட்டுள்ளது.

தமிழகத்தில் கிராப் பஞ்சாயத்து, பஞ்சாயத்து யூனியன், மாவட்ட பஞ்சாயத்து, பேரூராட்சி, நகராட்சி, மாநகராட்சி என்ற அடிப்படையில் உள்ளாட்சி அமைப்புகள் இதுவரை செயல்பட்டு வருகின்றன என்பது குறிப்பிடத்தக்கது.

தமிழக அரசு பிறப்பித்துள்ள அவசர சட்டத்தை பாட்டாளிகட்சி தலைவர் ராமராஸ் வரவேற்றாலும், ஒரு கட்சியின் சார்பில் தேந்தெடுக்கப்படும் மன்ற உறுப்பினர்கள் பல்வேறு காரணங்களுக்காக வேறு கட்சியைச் சேர்ந்தவர்களுக்கு வாக்களித்து விடும் அபாயம் இருக்கிறது. அதைத் தடுக்க அப்படி வாக்களிக்கும் மன்ற உறுப்பினரின் பதவியைப் பறிக்க வகை செய்ய வேண்டும் என்றும் யோசனை ஒன்றை அரசுக்கு தெரிவித்துள்ளார். மேலும் அவர் நாடாளுமன்ற, சட்டப்பேரவை உறுப்பினர்கள் கட்சிமாற தடைச் சட்டம் உள்ளதுபோல் உள்ளாட்சி அமைப்புகளின் பிரதிநிதிகள் கட்சி மாறுவதைத் தடுக்கவும் வகை செய்ய வேண்டும் என்றும், மற்றும் தலைவர் தேர்தல் ரகசிய வாக்கெடுப்பு மூலம் இல்லாமல் வெளிப்படையாக நடைபெற வேண்டும் என்றும் கூறியுள்ளார்.

இந்நிலையில் இந்த அவசர சட்டத்தை அ.தி.மு.க பொதுசெயலரும், எதிர்க்கட்சி தலைவருமான ஜெயலலிதா கடுமையாக விமரிசித்துள்ளது குறிப்பிடத்தக்கது.

அவசர அவசரமாக இந்த சட்டத்தை கொண்டு வருவதற்கான காரணம் என்ள என்றும், சட்டசபை கூட்டத்தொடருக்கு முன்பே இச்சட்டம் கொண்டு வருவதன் நோக்கம் என்ன? என்றும் வினா எழுப்பிய அவர், மக்கள் நலனைக் கருத்தில் கொண்டு இச்சட்டம் கொண்டு வரவில்ல என்று ஆளும் தி.மு.க மீது குற்றம் சாட்டியுள்ளார். அதுமட்டுமல்லாமல் இச்சட்டம் உள்ளாட்சி அமைப்புகளை மேம்படுத்தும் விதத்தில் உருவாக்கப்படவில்லை என்றும் குறை கூறியுள்ளார்.

எது எப்படியிருந்தாலும் இந்த அவசர சட்டத்தின் மூலம் பலன் அடையக்கூடிய கட்சிகள் தி.மு.கவும், அ.தி.மு.கவும்தான் என்று சொல்லலாம். ஏனென்றால் இந்த இரு கட்சிகள் தான் அதிக எண்ணிக்கையில் போட்டியிடும் நிலையில் உள்ளது. மற்ற கட்சிகள் எல்லாம் குறைந்த எண்ணிக்கையில்தான் போட்டியிட முடியும்.