படியெடுத்தல்

ஆதிமூலம்: தெருவாசகம் — யுகபாரதி — உதவி இயக்குநர்

வலைப்பதிக்கத் துடிக்காதவர்
வஞ்சத்திலும் சிரிக்கிறவர்
படம் காட்ட விரும்புவதால்
பந்தாவை ருசிக்கிறவர்

வாரமுறையில் நட்சத்திரத்தோடு
வாழ நேர்ந்தாலும்
தமிழ்மணத்தின் வெளிச்சத்தில்
தேதியைக் கடத்துபவர்

இலவம் பஞ்சைப் போல்
ரேட்டிங் கற்பனைகள்
பின்னூட்டங்களின் எதிரொலி போல்
கீழிழுக்கும் சங்கடங்கள்

அச்சிடப் பத்திரிகையின்றி
அக்குணிக்குள் உருளுகிறார்
கொறிக்கப் பழைய படம்
கணித்திரையில் பருகுகிறார்

எழுதும் குறிப்புகளில்
எத்தனையோ சொதப்பல்கள்
சந்திப் பாம்பு கொத்தும்
பரமபத சறுக்கல்கள்

டைலனால் போடாத
தலைவலி போல
தட்ஸ்தமிழ் செய்தியோடை
கிடைக்குமிவர் நாடியில்

இயங்காத எழுத்துரு
இரியல்போக்குக்கு அடையாளம்
மறுக்கும் கூகிளுடன்
மல்லுக்கு நிற்கின்றார் தினந்தோறும்

பாடாவதி இணைப்பில்
படுத்திருக்கும் இணையத்தளம்
டயல்-அப் புன்னகையில்
டான்ஸ் ஆடுவார் தவக்கோலம்

அளந்த கதையெல்லாம்
அழகாக பதிவு ஆகும்
இழந்த ப்ளாக் போஸ்ட் மட்டும்
மீண்டும் மீண்டும் பதிவாகும்.

— வலையாசகம்