Snap Judgment

கில்லியில் இணைக்கலாம். அங்கு ஃபார்முக்கு திரும்பிய டெண்டுல்கராக பிரகாஷ் ஒழுங்காக அடித்து ஆடி வாசகர்களை குஷிக்குள்ளாக்கும்போது, டிராவிட் மாதிரி சிங்கிள் எடுப்பது போஷாக்கு தரும்.

கோர்வையாக சேர்த்து ஒவ்வொன்றையும் தனிப் பதிவாக ஆக்கலாம். படிப்பவருக்கு பொறுமை போகலாம். எழுதுபவனோ அவசரக் குடுக்கை. அங்கும் எங்கும் தேடி தெளிந்து பதிவு எழுத முடியாத அவசரக் குடுக்கை.

எனவே, அவசர தபால்.

1. இருவர்

   பிடித்திருக்க வேண்டிய 7:45-ஐ தவறவிட்ட ரயில் நிலையம். இருவர் கவனத்தை ஈர்த்தனர்.

   1. கண் பார்வையற்றவர்: என்னை மாதிரியே தோளில் கைப்பை. கழுத்துக்கு பட்டை கட்டியிருந்தார். வேலை முடித்து சோர்வுற்ற முகம். சிரிக்கும் பாவம். திடமான உறுதி முகத்தில் தெரிகிறது. நடைபாதையில் தடைகள் இருக்கிறதா என்று அறிய குச்சி ஒன்றை இடதும் வலதுமாக ஆட்டி விறுவிறு நடை. அவரின் வழியில் வந்தவர்கள் ஒதுங்கினார்கள். மூன்று மாடிகளை ஏற்றி அழைத்து செல்லும் எஸ்கலேட்டரில் தடுமாறாமல், தட்டிப் பிடித்து ஏறி நின்றார். இறங்க வேண்டிய இடத்தில் உதவி செய்தவர்களுக்கு நன்றி சொன்னார். அடுத்த வேலையை பார்க்கவோ, வீட்டுக்கோ துரிதமாக விரைந்து விட்டார்.

   சலிப்புற்ற இரவில், அனுதினச் சுழலில் மாட்டிக்கொண்டவர்களை, அவரிடம் தென்பட்ட உற்சாகமும், செயல்படுதிறனும் தொற்றிக் கொள்ள வைக்கிறார்.

   2. அனாமதேயமாக திட்டிக் கொண்டிருந்தவர்: அதே போர்ட்டர் சதுக்கம். புத்தகக் கடையில் ஏறி இறங்கி திரும்புகிறேன். மின்விளக்கு வேலை செய்யாத தெருமுக்கு. நடையை வேகப்படுத்துகிறேன். ஆங்கிலத்தின் நான்கெழுத்து சுடுசொற்கள் கொண்ட உரையாடல் காதில்படுகிறது. இரவலர்கள் இருப்பதை அப்போதுதான் பார்க்க நேரிடுகிறது. பயம் கலந்த பச்சாதபம் வருகிறது. எதையோ மோசமாக கடிந்துரைத்தார்கள். தொடர்ந்து விரக்தி மேலிட்ட கோப சம்பாஷணை சன்னமாக தொடர்கிறது.

   காதல் கவிதையில் எதிர்பாலாரின் கவர்ச்சியும் தாபமும் ஏக்கம் கலந்த உணர்வோடு வெளிவரும். தாடி வளர்த்த வீடற்றவர்களின் கோபத்தில் நேரவிரயமும் குறைபாடுகளும் பச்சாதாபம் கலந்த வெறுப்புடன் வெளிவருகிறது.

2. NBC.com – Studio 60 on the Sunset Strip: ஸ்டூடியோ 60 ரசிக்க வைக்கிறது. நெடுந்தொடர் எழுதுபவர்களின் வாழ்க்கையை விளக்கும் புதிய தொலைக்காட்சித் தொடர். கிண்டல், கேலி செய்வதில் உள்ள சூட்சுமங்களை சொல்கிறார்கள். உள்ளர்த்தம் பார்வையாளனுக்கு விளங்காவிட்டால் எபிசோடின் தரத்தைக் குறைத்துக் கொள்ள நேரிடுகிறது. ஆட்சியாளரை நக்கலடித்தால், ‘எதிர்க்கட்சி ஆதரவா’ என்னும் நாமம் விழுகிறது.

   ஒரு வாரத்தில் அடுத்தவரை மட்டும் பகிடி செய்யாமல், தன்னை வைத்து நகைச்சுவை செய்தார்கள். மற்றொன்றில் ஏழு நாள் என்னும் கெடுபிடிக்குள் எழுத்தாளர், தயாரிப்பாளர், நடிப்போர், அரங்க நிபுணர், மேலாளர் என்று பலரின் பங்கை செவ்வனே திரையாக்கினார்கள். சென்ற வாரத்தில் எழுத்து திருட்டு கவனிக்கப்பட்டது.

3. தமிழில் பழைய படங்களைத் திரும்ப எடுத்தால் எவ்வளவு நன்றாக இருக்கும் என்றார் சுதர்சன். பிடித்த நட்சத்திரங்களை பழைய கதாபாத்திரங்களில் பொருத்திப் பார்க்க நினைக்கிறேன். மீண்டும் தூசி தட்டி வெளிவர ஆசைப்படும் பட்டியல்:
   1. தூறல் நின்னு போச்சு – இரண்டாம் பகுதியில் போதிய மாற்றங்கள் தேவை : பரத், அசின்; நண்பர்களாக மற்ற ‘பாய்ஸ்’
   2. பொய்க்கால் குதிரைகள் – புதிய படத்திற்கு சுந்தர் சி இயக்குநர் : நந்தா (மௌனம் பேசியதே), பாவ்னா
   3. பட்டணத்தில் பூதம் : பிரசன்னா, மீரா ஜாஸ்மின்
   4. தூக்கு தூக்கி : சூர்யா, கோபிகா
   5. மூன்று முகம் : பசுபதி (விருமாண்டி ‘கொத்தாளன்’), நவ்யா நாயர் (ராஜலஷ்மி வேடத்திற்கு), சினேஹா (ராதிகாவாக), சமிக்ஷா (சில்க் ஸ்மிதாவிற்கு)

   

4. Angelina Jolie sparks casting controversy – Race in America – MSNBC.com :: பெரியார் திரைப்படத்தில் குஷ்பு மணியம்மையாக நடிப்பது உள்ளூர் விவகாரம். இது ஹாலிவுட் பிரச்சினை.

   டேனியல் பேர்ல் பாகிஸ்தானில் அல்-க்வெய்தாவினால் கொல்லப்பட்டார். வால் ஸ்ட்ரீட் ஜர்னல் நாளிதழின் செய்தியாளர். தீவிரவாதத்திற்கு பலியானார். கத்தி தூக்காமல் பேனா தூக்கியவர். கத்தியால் கொடூரமாக மரணமடைந்தார். எல்லாவற்றிற்கும் மேலாக அமெரிக்கர். இவரின் வாழ்க்கை திரைப்படமாக எடுக்கப்படுகிறது.

   நிஜ வாழ்க்கையில் டேனியலின் மனைவி மரியான் பேர்ல் (Mariane Pearl) எழுதிய A Mighty Heart: The Brave Life and Death of My Husband Danny Pearl என்னும் புத்தகத்தை அடிப்படையாகக் கொண்டி திரைப்படம் தயாராகிறது. மரியான் க்யூபாவை சேர்ந்த ஆப்பிரிக்கருக்கும் நெதர்லாண்டுக்காரருக்கும் பிறந்தவர். ஆஞ்சலினா ஜோலியோ அக்மார்க் வெள்ளை ரகம்.

   சலசலப்புக்கு அஞ்சாமல், ஆன்ஜலினா Daniel Pearl Foundationக்கு $100,000 நன்கொடை வழங்கியிருக்கிறார்.

   என்னுடைய சலசலப்பு கேள்வி: பெரியார் படத்தில் நடிப்பதற்காக குஷ்பு எந்த தொண்டு அமைப்பிற்காக நிதி தர்மம் செய்துள்ளார்?

5. Chup Chup Ke (2006): தயவு செய்து நான் பட்ட கஷ்டத்தை நீங்களும் படவேண்டும் என்றால் மட்டும் பார்க்கலாம். ஹிந்தியில் கேவலமான படங்கள் வருவதில்லை என்று யாராவது சொன்னால், வாக்குவாதத்தில் பங்குபெற உபயோகமாகும் பொருள்.
6. காலச்சுவடு
   

Tamil Blog | Movies | People

பொழிச்சலூரைக் காப்பாற்றுங்கள்: மேதா பட்கர் வந்தார். அனைத்து தினசரிகளிலும் செய்தி வந்தது.

தினமணி செய்தி இங்கே: Save Pozhichaloor Houses from Airport Extension Project

சென்னை விமான நிலைய விரிவாக்கத்துக்காக பொழிச்சலூர், கவுல்பஜார், அனகாபுத்தூர் பகுதிகளில் உள்ள குடியிருப்புப் பகுதிகளை கையகப்படுத்த திட்டமிடப்பட்டது. இதற்கு எதிர்ப்பு தெரிவித்து இப்பகுதி மக்கள் கடந்த 10 மாதங்களாக தொடர்ந்து பல்வேறு போராட்டங்களை நடத்தி வருகின்றனர்.

சில தகவல்கள்:

1. முன்னூறு கோடி ரூபாய் மதிப்புள்ள 1457.5 ஏக்கர் நிலத்தை இலவசமாக ஒதுக்கி இருக்கிறார்கள்.
2. நாலாயிரம் வீடுகள்; 15,000 குடிமக்கள் பாதிக்கப்படுகிறார்கள்.
3. நான்கு கோவில்கள், இரண்டு தேவாலயங்கள், ஒரு மசூதி, 558 வீடுகள், 156 குடிசைகள், 156 மாடி வீடுகள் உட்பட 883 கட்டிடங்கள் இடிக்கப்படும்.
4. புதிய விமான நிலையத்தை முடிக்க இரண்டாயிரம் கோடி (20,00,00,00,000) செலவழிக்கிறார்கள்
5. புதிய விமான நிலையத்தை முடிக்க மூன்று வருடங்கள் ஆகும்.
6. புதிய விமான தளத்தை (terminal) முடிக்க இரண்டு வருடங்கள் ஆகும்.
7. புதிய விமான தளத்தை (terminal) முடிக்க 650 கோடி தேவைப்படும்.
8. பாதிக்கப்பட்டோர் சார்பாக மத்திய மந்திரி பிரஃபுல் படேலை, சக அமைச்சர் டி.ஆர். பாலு சந்தித்திருக்கிறார்.
9. சென்னை மீனம்பாக்கத்தின் அண்ணா & காமராசர் விமான நிலையத்தில் கடந்த வருடத்தில் – 43.2% பயணிகள் அதிகரிப்பு
10. சென்னை மீனம்பாக்கத்தின் அண்ணா & காமராசர் விமான நிலையத்தில் கடந்த வருடத்தில் – 37.5% விமானப் போக்குவரத்து அதிகரிப்பு
11. ஜூலை 2000த்தில் திட்டத்திற்கு கால்கோள்.
12. செப்டம்பர் 2005 வரை மணப்பாக்கம், தாரப்பாக்கம், தண்டலம், கோவூர், கௌல் பஜார், கொளப்பாக்கம், கெருகம்பாக்கம், பெரிபணிச்சேரி ஆகிய கிராமத்தின் நிலங்களைக் கொண்டிருந்தது.
13. டிசம்பர் 14, 2005 கொடுக்கப்பட்ட மாற்றுத் திட்டத்தில் பம்மல், அனகாபுத்தூர், பொழிச்சலூர் திடீரென்று இணைந்தது.
14. வீடு கையை விட்டுப்போகும் நிலையில், திருமணங்கள் கூட தடைப்படுகின்றன.

சில கேள்விகள்:

1. சென்னையில் துணை நகரம் அமைப்பதை தடுத்த பெரும் பணக்காரர்களும், நிலச்சுவான்தார்களும், கூட்டணிக் கட்சிகளும்தான், இந்தத் திட்டத்தை மாற்றுவதற்கு காரணமா?
2. யாருமே விட்டுக்கொடுக்கா விட்டால் விமான நிலையத்தை எங்குதான் அமைப்பது?
3. நஷ்ட ஈடாக எவ்வளவு கொடுக்கிறார்கள்?
4. மணமுடிப்பைக் கூட வீட்டை காரணம் காட்டி தட்டிக் கழிப்பவர்களை, வரதட்சிணை வழக்கு போட்டு முட்டிக்கு முட்டி தட்ட முடியுமா?
5. இன்றைய கூட்டணி ஆட்சியில் அங்கத்தினராக இருக்கும் கம்யூனிஸ்ட் கட்சிகள் இதற்கு இன்னும் பலமாக குரல் எழுப்புமா?
6. இன்றைய கூட்டணி ஆட்சியில் அங்கத்தினராக இருக்கும் பாட்டாளி மக்கள் கட்சி (பா.ம.க.), துணை நகரத்திற்கு மட்டும் ஏன் சிறப்பு கவனிப்பைக் கோரி கைவிடச் செய்கிறது?

   தொடர்புள்ள செய்திகள்:

   1. வண்டலூர் அருகே 30 ஆயிரம் ஏக்கரில் துணை நகரம்: பேரவையில் முதல்வர் அறிவிப்பு : துணை நகரம் அமைக்கும் திட்டம்: உடனே கைவிட ராமதாஸ் வலியுறுத்தல்
   2. சேர்த்து வைத்த துணைநகரம் :: கைகொடுத்த பா.ம.க… கண்சிமிட்டும் ரஜினி! – எஸ்.சரவணகுமார் (ஜூனியர் விகடன்)

துணை நகரம் (தினமணி தலையங்கத்தில் இருந்து):

எந்த ஓர் அபிவிருத்தித் திட்டமானாலும் அது மக்களில் ஏதோ ஒரு பிரிவினருக்கு ஓரளவில் பாதிப்பை விளைவிப்பதாகத்தான் இருக்கும். யாருக்கும் எவ்விதப் பாதிப்பும் ஏற்படாமல் பார்த்துக் கொண்டாக வேண்டும் என்ற அளவுகோல் பின்பற்றப்படுவதானால் மேட்டூர் அணையில் தொடங்கி சென்னை சென்ட்ரல் நிலைய விரிவாக்கம் வரை எந்த ஒரு திட்டத்தையும் நம்மால் நிறைவேற்றி இருக்க முடியாது. ஆகவே ஏற்படுகின்ற பாதிப்புகளைவிட ஒரு திட்டத்தால் பெருவாரியான மக்களுக்கு ஏற்படக்கூடிய நன்மைதான் பிரதானமாகக் கணக்கில் கொள்ளப்பட வேண்டும். உலகெங்கிலும் இந்த நோக்குத்தான் கடைப்பிடிக்கப்படுகிறது. நீண்டநோக்கில் மேற்கொள்ளப்படுகிற திட்டங்களைச் சீர்தூக்கிப் பார்த்து ஆராய வேண்டுமே தவிர அரசியல் நோக்கில் பார்க்கக் கூடாது.

கடைசியாக என்னுடைய ரெண்டணா:
என்னுடைய வீடு, பாதிக்கப்பட்ட பகுதியில் இல்லாததால்தான் இப்படி சாவகாசமாக நீட்டி முழக்கி எழுத முடிகிறது. மேதா பட்கர் போல் உறைவிடம் விட்டு அகல்வோர் அனைவருக்கும் அயராமல் ஓட முடிவதை பாராட்ட மட்டுமே மனம் நினைக்கிறது.

Pozhichaloor | Airport | Chennai | Displaced | Extension | Meenambakkam

Dinamani.com – Chennai Page

வாக்காளர்களுக்கு மூக்குத்தி விநியோகம்: அ.தி.மு.க.வினர் கைது

சென்னை, அக். 12: போரூர் காரம்பாக்கத்தில் வாக்காளர்களுக்கு மூக்குத்தி விநியோகித்த அ.தி.மு.க. வேட்பாளரின் உறவினர்கள் 3 பேர் புதன்கிழமை கைது செய்யப்பட்டனர்.

போரூரை அடுத்துள்ளது காரம்பாக்கம் ஊராட்சி. இதன் தலைவர் பதவிக்கு அ.தி.மு.க. சார்பில் காசி ஜெனார்த்தனம் போட்டியிடுகிறார். திமுக சார்பில் க.கணபதி போட்டியிடுகிறார்.

இருவரும் தீவிர பிரசாரத்தில் ஈடுபட்டு வருகின்றனர். இந்நிலையில், தனக்கு சாதகமாக வாக்களிக்க வேண்டும் எனக் கோரி வாக்களர்களுக்கு அ.தி.மு.க.வேட்பாளர் காசி ஜெனார்த்தனம் மூக்குத்திகள் கொடுத்தாக தி.மு.க. வேட்பாளர் போலீசில் புகார் செய்தார்.

இதையடுத்து, சம்பவ இடத்துக்கு விரைந்த போலீஸôர் அ.தி.மு.க. வேட்பாளருக்கு ஆதரவாக பிரசாரத்தில் ஈடுபட்டவர்களிடம் சோதனை நடத்தினர்.

இதில், காசி ஜெனார்த்தனின் தம்பி மணி (50), அவரது உறவினர்கள் சுரேஷ், கட்சியின் கிளைப் பொருளாளர் சரவணன் என்ற முருகன் ஆகியோரிடம் இருந்து 23 மூக்குத்திகள் பறிமுதல் செய்யப்பட்டன.

மேலும், 25 பேருக்கு அவர்கள் மூக்குத்தி கொடுத்தது தெரியவந்தது. இதையடுத்து மூவரும் கைது செய்யப்பட்டனர்.

Dinamani.com – TamilNadu Page

“திராவிடர்களின் தலைவன் என்பதே பெருமை’

சேலம், அக். 12: “தமிழகத்தின் முதல்வர் என்பதைவிட, திராவிடர்களின் தலைவன்- வழிகாட்டி என்பதே எனக்குப் பெருமை’ என்று முதல்வர் கருணாநிதி கூறினார்.

சேலத்தில் புதன்கிழமை நடந்த தேர்தல் பிரசாரக் கூட்டத்தில் அவர் பேசியது:

பட்டம், பதவிக்காக நாங்கள் திராவிடர் கழகத்திலும், திமுக-விலும் சேரவில்லை. எப்படியாவது அதிகாரத்தைப் பெற வேண்டும் என்றும் நினைக்கவில்லை.

ஏற்றுக் கொண்ட கொள்கை அடிப்படையில் செயல்பட்டோம். முதலமைச்சர் என்பதைவிட திராவிடர் என்று கூறிக் கொள்வதில்தான் நான் மகிழ்ச்சி அடைகிறேன்.

தமிழகத்தில் திராவிடர்களுக்கு தனி சரித்திரம் உண்டு. ஆனால் இப்போது யார் யாரையோ திராவிடன் என்று குறிப்பிடுகின்றனர்.

திராவிடன் என்றால் மூடநம்பிக்கை, ஜாதி, மனுதர்மத்தை எதிர்ப்பவன்.

மனிதனை மனிதனாக மதிக்க வேண்டும். மானத்தோடு வாழ வேண்டும் என்ற உணர்வோடு செயல்படுபவன். அந்த உணர்வைத்தான் திராவிட இயக்கங்கள் ஊட்டி வளர்த்து வருகின்றன.

அவ்விதத்தில் என்னை திராவிடர்களின் தலைவன்- வழிகாட்டி என்று கூறுவதே மகிழ்ச்சியளிக்கிறது.

எதிர்கால தலைமுறையினர் மானத்தோடு, நல்ல சூழலில் வாழ வேண்டும் என்பதற்காக திராவிட இயக்கங்கள் பாடுபடுகின்றன. அதற்கு நீங்களும் ஆதரவளிக்க வேண்டும்.

திராவிடர் இயக்கத்தினர் தியாகத் திருவிளக்குகள். உங்கள் வாரிசுகளின் எதிர்காலத்தை எண்ணி அந்த இயக்கங்களை நீங்கள் ஆதரிக்க வேண்டும் என்று கேட்டுக் கொண்டார் கருணாநிதி.

Dinamani.com – TamilNadu Page

மதுரை இடைத் தேர்தலில் 68% வாக்குப்பதிவு

மதுரை, அக்.12: மதுரை மத்திய சட்டப் பேரவைத் தொகுதியில் புதன்கிழமை நடைபெற்ற இடைத்தேர்தலில் 68.7 சதவீத வாக்குகள் பதிவாகியுள்ளன. தொகுதியின் எந்தப் பகுதியிலும் அசம்பாவிதச் சம்பவங்கள் எதுவும் நடைபெற்றதாகத் தகவல் இல்லை.

வாக்குப் பதிவு தொடங்கியபோதே சுப்பிரமணியபுரம், சுந்தரராஜபுரம், மகபூப்பாளையம், பேச்சியம்மன்படித்துறை ஆகிய பகுதிகளில், ஆண்களும், பெண்களும் நீண்ட வரிசையில் நின்று வாக்களித்தனர்.

விறுவிறுப்பான வாக்குப்பதிவு: வாக்குப் பதிவு தொடங்கியபோது, வாக்குப் பதிவு இயந்திரத்தில் கோளாறு ஏற்பட்டதாலும், வாக்காளர் சிலர் கட்சி சின்னத்துடன் கூடிய பனியனுடன் வந்ததாலும் ஒரு சில இடங்களில் பிரச்சினை ஏற்பட்டது. எனினும் தொகுதியின் அனைத்துப் பகுதிகளிலும் பெரிய அசம்பாவிதம் ஏதுமின்றி வாக்குப்பதிவு நடைபெற்றது.

அனைத்து வாக்குச் சாவடிகளிலும் துணை நிலை ராணுவத்தினர் பிரதான பாதுகாப்புப் பணியில் ஈடுபடுத்தப்பட்டனர். மொத்தம் 3000-க்கும் மேற்பட்ட போலீஸôர் பாதுகாப்புப் பணியில் ஈடுபட்டனர்.

தேர்தல் பார்வையாளர்கள்:மாவட்ட ஆட்சியரும், மாவட்ட தேர்தல் அலுவலருமான உதயச்சந்திரன், தேர்தல் பார்வையாளர்கள் சஞ்சீவ்குமார், மீனா, மாஹி, தென்மண்டல ஐ.ஜி. சஞ்சீவ்குமார், மாநகர் காவல்துறை துணை ஆணையர்கள் அறிவுச்செல்வம், பி.நாகராஜன் ஆகியோரும் வாக்குச் சாவடிகளுக்குச் சென்று வாக்குப்பதிவு அமைதியாக நடைபெறுகிறதா என்பதைப் பார்வையிட்டனர்.

வாக்களித்த வேட்பாளர்: பிரதானக் கட்சிகளின் வேட்பாளர்களில் திமுக வேட்பாளர் கௌஸ்பாஷாவுக்கு மட்டுமே இத்தொகுதியில் வாக்குரிமை உள்ளது. அவர், டி.பி.கே. சாலையில் இருந்த வாக்குச் சாவடிக்கு, வாக்களிக்கச் சென்றபோது, கட்சி சின்னத்துடன் கூடிய பாட்ஜ் அணிந்திருந்தார். இதற்கு வாக்குச் சாவடியில் இருந்த பிற கட்சி ஏஜெண்ட்கள் எதிர்ப்புத் தெரிவித்ததால் அதை எடுத்துவிட்டுச் சென்று வாக்களித்தார்.

வாக்காளர்கள்: இத்தொகுதியில் மொத்தம் 1,32,231 வாக்காளர்கள் உள்ளனர். இதில் 66,331 பேர் ஆண் வாக்காளர்கள், 65,900 பேர் பெண் வாக்காளர்கள்.

இத் தேர்தலில்தான் தமிழகத்தில் முதன்முறையாக வாக்காளர் புகைப்படத்துடன் கூடிய வாக்காளர் பட்டியல் பயன்படுத்தப்பட்டது. வாக்காளர்கள் பெரும்பாலும் புகைப்பட அடையாள அட்டையையே எடுத்து வந்திருந்தனர். அடையாள அட்டை இல்லாதவர்கள், தேர்தல் ஆணையம் அறிவித்த 13 வகையான மாற்று ஆவணங்களை வாக்களிப்பதற்குப் பயன்படுத்தினர்.

19 வேட்பாளர்கள் போட்டியிடுவதால் ஒவ்வொரு வாக்குச் சாவடிக்கும் 2 வாக்குப்பதிவு இயந்திரங்களும், ஒரு கட்டுப்பாட்டு இயந்திரமும் பயன்படுத்தப்பட்டன.

கடந்த பொதுத் தேர்தலில் மொத்தம் 94,224 வாக்குகள் பதிவானது. இதில் திமுக வேட்பாளராகப் போட்டியிட்ட பி.டி.ஆர். பழனிவேல்ராஜன் 43,185 வாக்குகளும், அதிமுக வேட்பாளராகப் போட்டியிட்ட எஸ்.டி.கே. ஜக்கையன் 35,992 வாக்குகளும், தேமுதிக வேட்பாளர் சுந்தரராஜன் 12,038 வாக்குகளும் பெற்றனர்.

அக்.17-ல் வாக்கு எண்ணிக்கை: இடைத் தேர்தலில் பயன்படுத்தப்படும் அனைத்து வாக்குப் பதிவு, கட்டுப்பாட்டு இயந்திரங்களும் போலீஸ் பாதுகாப்புடன் மதுரை மருத்துவக் கல்லூரியில் அமைக்கப்பட்டுள்ள வாக்கு எண்ணும் மையத்துக்கு எடுத்துச் செல்லப்பட்டன. வாக்கு எண்ணிக்கை வரும் அக்.17-ம் தேதி நடைபெறுகிறது.

BBCTamil.com

தமிழகத்தின் பாப்பாபட்டி, கீரிப்பட்டி, நாட்டமங்கலம், கொட்டகாச்சியேந்தல் உள்ளாட்சித் தேர்தல் நிலவரம்

தமிழகத்தில் நடைபெறவுள்ள உள்ளாட்சித் தேர்தலுக்கான பிரச்சாரம், கடந்த இரண்டு வாரமாக திருவிழா போல கோலகலமாக நடைபெற்று வருகின்றது. ஆனால் மதுரை ஒட்டிய பாப்பாபட்டி, கீரிப்பட்டி, கொட்டக்காச்சியேந்தல், நாட்டமங்கலம் போன்ற கிராமப் பஞ்சாயத்துகளில், தேர்தல் பிரச்சாரத்தின் சுவடே தெரியவில்லை.

தாழ்த்தப்பட்டவர்களுக்கு ஒதுக்கப்பட்டுள்ள இந்த பஞ்சாயத்துகளில், பஞ்சாயத்து தலைவர்களை தேர்வு செய்ய தமிழக அரசு கடந்த பத்தாண்டுகளாக மேற்கொண்டு வந்த முயற்சிகள் பலனளிக்கவில்லை. ஒன்று தேர்தலில் யாரும் போட்டியிடுவதில்லை, அல்லது ஊரின் சார்பில் யாராவது தாழ்த்தப்பட்டவரை தேர்தலில் நிறுத்தி வெற்றிபெற செய்து, பதவியேற்கவும் செய்து விட்டு, மறு விநாடியே ராஜினாமா செய்ய வைக்கும் நிலைமை நீடிக்கிறது.

இந்த நான்கு ஊர்களுக்கு தற்போதும் தேர்தல் அறிவிக்கப்பட்டுள்ளது.

முதலாவதாக கீரிப்பட்டி பஞ்சாயத்து தலைவர் பதவிக்கு ஊரின் சார்பில் ஒருவரும், மார்க்சிஸ்ட் கம்யூனிஸ்ட் கட்சியின் சார்பில் ஒருவர் வேட்பு மனு தாக்கல் செய்தனர். இதில் ஊரின் சார்பில் வேட்பு மனு தாக்கல் செய்தவரின் மனு தள்ளுபடி செய்யப்பட்டுள்ளது. இதனால் மார்க்சிஸ்ட் கம்யூனிஸ்ட் கட்சியின் வேட்பாளர் போட்டியின்றி தேர்வாகின்றார்.

ஆனால் இதனை உள்ளூர் மக்கள் ஏற்க மறுக்கின்றனர். இவ்வாறு நிலவும் சூழ்நிலையில், இப்பகுதிகளுக்கு சென்ற பிபிசியின் செய்தியாளர் எல்.ஆர்.ஜெகதீசன், இந்த ஊர்களின் தேர்தல் நிலவரம் குறித்து தயாரித்துள்ள பெட்டகத்தினை பிபிசி உலக சேவை வானொலியின் தமிழ் சேவையான செய்தியரங்கத்தில் கேட்கலாம்.

Dinamani.com – Editorial Page

காவலன் காவல் அன்றெனில்…

மதுரை மத்திய தொகுதி இடைத்தேர்தலில் நடைபெற்றுள்ள வன்முறைகளுக்காக திமுக, அதிமுக இரு கட்சிகளையும் தேர்தல் ஆணையம் கண்டித்துள்ளது. இரு கட்சிகளுமே, “இதில் உண்மையில்லை’ என்று மறுக்கலாம். அல்லது “தொண்டர்கள் சிலர் உணர்ச்சிவசப்பட்டு செய்திருக்கலாம்’ என்று பொத்தாம்பொதுவில் சொல்லலாம். சட்டத்தின் முன்பாக தங்கள் பொறுப்புகளைக் கை கழுவினாலும் இரு கட்சிகளுக்கும் இது அவமானம். இந்த வன்முறைகளுக்கு மெüன சாட்சியாக இருந்த கூட்டணிக் கட்சிகளுக்கும் (வெற்றி தோல்விகளில் பங்குகொள்வதுபோல) இந்த வன்முறையிலும் தார்மிகப் பொறுப்பு உள்ளது.

வாக்காளர்களுக்குப் பணம் பட்டுவாடா செய்வதற்காக அதிமுகவின் முன்னாள் அமைச்சர் ஒரு சத்திரத்தில் இருந்ததாகவும் அப்போது திமுகவினர் அவரை பணத்துடன் பிடித்து அரைநிர்வாணமாக ஊர்வலமாக அழைத்து வந்ததாகவும் இதில் காவல்துறை அதிகாரிகள் கண்டுகொள்ளாமல் இருந்ததாகவும் செய்திகள் விவரிக்கின்றன. படம்பிடிக்கச் சென்ற பத்திரிகையாளர்களும் தாக்கப்பட்டுள்ளனர்.

ஒரு சத்திரத்துக்குள் புகுந்து தாக்குகின்ற அளவுக்கு ஆத்திரம் ஏற்படக் காரணம் ஒரு இடைத்தேர்தலின் தோல்வியை ஆளும்கட்சி தன் வீழ்ச்சியாகக் கருதுவதும் அதை எதிர்க்கட்சி தனது அடுத்த பொதுத்தேர்தலுக்கான முதல் கணக்குத் தொடக்கம் என்று நினைப்பதும்தான். இடைத்தேர்தலுக்கு அதிக முக்கியத்துவம் தராமல், இரு கட்சித் தலைமைகளும் கட்சிபலம் முழுவதையும் களம் இறக்குவதைத் தவிர்த்தாலே வன்முறை குறைந்துவிடும்.

அரசியல் பாகுபாடுகள் ஒரு புறம் இருக்க, இந்த வன்முறைகள் வாக்காளர் மத்தியில் பீதியை ஏற்படுத்தக் கூடியவை என்பதால் இதனைத் தொடக்கத்திலேயே தடுத்து நிறுத்த வேண்டிய பொறுப்பு காவல்துறைக்கு உள்ளது. ஆனால், மதுரை போலீஸ் கமிஷனர் சிதம்பரசாமி பாரபட்சமின்றி செயல்படவில்லை என்றும், தனது பதவிக்கு ஏற்றபடி அவர் நடந்துகொள்ளவில்லை என்றும் தேர்தல் ஆணையம் கூறியுள்ளது.

மதுரை போலீஸ் கமிஷனர் பதவியிலிருந்து சிதம்பரசாமி பணியிடம் மாற்றப்பட்டபோதிலும் இது காவல்துறை முழுவதற்குமே இழுக்கு. அதேநேரம் காவல்துறை என்பது ஆளும்கட்சிக்கே ஆதரவாகச் செயல்படும்- அல்லது செயல்படுகிறது என்ற குற்றச்சாட்டுக்கு காரணம் அரசியல் தலைவர்கள்தான்.

தங்களுக்கு வேண்டிய ஐஏஎஸ், ஐபிஎஸ் அதிகாரிகளை பொறுப்புகளில் நியமிப்பதும், வேண்டிய அதிகாரிகளை மட்டுமே ஐஏஎஸ், ஐபிஎஸ் பதவிகளுக்காக மாநில அரசிலிருந்து பரிந்துரைப்பதும் அரசியல் தலைவர்கள் ஏற்படுத்திய வழக்கம். அதனால் காவல்துறையிலும் அரசு நிர்வாகத்திலும் கடமையைவிட “விசுவாசம்’ முக்கியமானதாக மாறிவிட்டது.

தனது விசுவாசக் கட்சி ஆட்சியில் இருந்தால் அதற்குப் பாதகமானவற்றை இருட்டடிப்பு செய்வதிலும் எதிர்க்கட்சியாக மாறும்போது ஆளும்கட்சியின் தவறுகளை உள்-ஒற்றுவேலை பார்த்து, பத்திரிகைகளுக்கு தீனிபோடுவதுமாக இவர்களின் விசுவாசக் கடமைகள் மாறிக்கொண்டே இருக்கின்றன.

யார் ஆட்சி செய்தாலும் தங்கள் கடமையை விட்டுக்கொடுக்காமல் பணியாற்றும் ஐஏஎஸ், ஐபிஎஸ் அதிகாரிகளுக்கு எந்நாளும் மதிப்பு உண்டு. குறிப்பாக மக்களிடத்தில்! அத்தகைய அதிகாரிகள் எண்ணிக்கை குறைந்து கொண்டே வருவதன் அடையாளம்தான் மதுரைச் சம்பவம்.

“மாதவர் நோன்பும் மாதரார் கற்பும் காவலன் காவல் அன்றெனில் அன்றாம்” – என்கிறது தமிழ் இலக்கியம். அரசனின் காவல் இல்லையானால் முற்றும் துறந்த மாமுனிவர்கள் தவம் இயற்றுவதும் பெண்கள் கற்புடன் இருப்பதும் சாத்தியம் இல்லையென்றாகிவிடும் என்பதே இதன் பொருள்.

Headline News – Maalai Malar

பல்லாவரம் நகரசபை: ராணிமேரி கல்லூரி மாணவி போட்டி

சென்னை, அக். 11-
பல்லாவரம் நகரசபையில் 12-வது வார்டில் கல்லூரி மாணவி ரேவதி சுயேட்சையாக போட்டியிடுகிறார். இவர் ராணி மேரி கல்லூரியில் தமிழ் இலக்கியம் 2-வது ஆண்டு படிக்கிறார்.

கடந்த ஆண்டு கல்லூரியின் செயலாளராக இருந்த ரேவதி தற்போது நகரசபை வார்டில் போட்டியிடுகிறார். 12-வது வார்டில் மொத்தம் 6,390 ஓட்டுகள் உள்ளன. அவருடன் சேர்த்து மொத்தம் 13 பேர் அந்த வார்டில் களத்தில் உள்ளனர்.

ரேவதிக்கு ஆதரவாக கல்லூரி மாணவிகள் ஓட்டு கேட்டு வருகிறார்கள். 12-வது வார்டில் உள்ள 8 குடியிருப்பு நல சங்கங்கள் அவருக்கு ஓட்டு அளிப்பது என்று முடிவு செய்யப்பட்டுள்ளது.

தேர்தல் செலவுக்காக தன்னால் ரூ. 15 ஆயிரத்திற்கு மேல் செலவு செய்ய முடியாது என்று மைபாட்டில் சின்னத்தில் போட்டியிடும் ரேவதி கூறியுள்ளார். அவர் வீடு வீடாக சென்று நோட்டீசுகளை கொடுத்து வாக்கு சேகரிக்கிறார். கடந்த 2 தினங்களில் மட்டும் தான் அவரது ஆதரவான போஸ்டர்களை ஓட்டி இருந்தனர். ஆட்டோவிலும் சென்று பிரசாரம் செய்தனர். தனக்கு வாக்கு அளித்தால் தூய்மையான குடிநீர், சாலை வசதிகள் செய்து தருவதாக 22 வயதான ரேவதி கூறியுள்ளார்.

Headline News – Maalai Malar

தேர்தல் பிரசாரத்தில் ருசிகரம்: குடிசை பெண்களுக்கு தோசை மாவு வழங்கிய ஜி.கே.வாசன்

சென்னை, மாநகராட்சி பகுதியில் மத்திய மந்திரி ஜி.கே.வாசன் சுற்றுப்பயணம் செய்து காங்கிரஸ் மற்றும் தி.மு.க. கூட்டணி வேட்பாளர்களுக்கு ஆதரவு திரட்டினார்.

107-வது வார்டில் காங்கிரஸ் வேட்பாளர் ருக்மணிக்கு ஆதரவு திரட்டினார். புஷ்பா நகர் குடிசை பகுதியில் நடந்து சென்று ஓட்டு கேட்ட வாசனுக்கு வயதான மூதாட்டி உள்பட ஏழை பெண்கள் ஆரத்தி எடுத்து வரவேற்பு கொடுத்தனர்.

மிகவும் ஏழை பெண்கள் செலவு செய்து ஆரத்தி எடுத்ததை பார்த்து நெகிழ்ந்த வாசன் அவர்களுக்கு சால்வை அணிவித்தார். வியாபாரி ஒருவர் தோசை மாவு பாக்கெட்டுகளை விற்ப னைக்கு வைத்து இருந்தார். ஒரு கிலோ எடையுள்ள அந்த மாவு பாக்கெட் என்ன விலை என்று விசாரித்தார். ரூ.12 என்றார் அவர்.

உடனே அவரிடம் இருந்த 20 பாக்கெட் மாவுக்கும் தனது பாக்கெட்டில் இருந்து ரூ.240 எடுத்து கொடுத்தார். அந்த மாவு பாக்கெட்டுகளை அங்கு நின்று கொண்டிருந்த ஏழை பெண்களுக்கு கொடுக்கும் படி கூறினார். பின்னர் தொடர்ந்து பிரசாரம் செய்தார்.

Dinamani.com – TamilNadu Page

பொருள்கள் விலை: ஜெ. ஒப்பீடு

சேலத்தில் தேர்தல் பிரசாரக் கூட்டத்தில் பேசிய ஜெயலலிதா, அதிமுக ஆட்சியில் பல்வேறு அத்தியாவசியப் பொருள்களின் விலை குறைவாக இருந்தது; தற்போது அவற்றின் விலை அதிகரித்து விட்டது என்று புள்ளி விவரங்களுடன் விளக்கினார்.

அவர் குறிப்பிட்ட விலை விவரம்: (அடைப்புக்குறிக்குள் அதிமுக ஆட்சியில் நிலவிய விலை)

மஞ்சள் ஒரு கிலோ ரூ.50 (ரூ.28)

புளி கிலோ ரூ.50 (ரூ.25)

வெள்ளைப்பூண்டு ரூ.75 (ரூ.50)

துவரம்பருப்பு ரூ.52 (ரூ.28)

உளுத்தம்பருப்பு ரூ.65 (ரூ.25)

கடலைப்பருப்பு ரூ.45 (ரூ.18)

பாசிப்பருப்பு ரூ.55 (ரூ.26)

மைதா ரூ.21 (ரூ.12)

கோதுமை மாவு ரூ.20 (ரூ.12)

ரவை ரூ.22 (ரூ.14)

மொச்சைப்பயறு ரூ.60 (ரூ.25)

காராமணி ரூ.50 (ரூ.25)

தனியா ரூ.45 (ரூ.28)

மிளகாய்வத்தல் ரூ.45 (ரூ.30)

சுண்டல்கடலை ரூ.50 (ரூ.30)

சீரகம் ரூ.125 (ரூ.90)

கடுகு ரூ.30 (ரூ.15)

வெல்லம் ரூ.12 (ரூ.6)

சர்க்கரை ரூ.18 (ரூ.15)

மிளகாய்த்தூள் ரூ.105 (ரூ.55)

பாமாயில் ரூ.50 (ரூ.30)

நல்லெண்ணெய் ரூ.50 (ரூ.38)

தேங்காய் எண்ணெய் ரூ.75 (ரூ.50)

ரீபைண்டு ஆயில் ரூ.55 (ரூ.28)

இதுதான் திமுக ஆட்சியின் லட்சணம் என்றார் ஜெயலலிதா.